01 апреля 2011 г.
Иртнĕ ĕмĕрĕн 70-мĕш çулĕсенчен пуçласах çурхи кунсенче пирĕн çĕршывра музыка эрни ирттереççĕ. Тĕллевĕ - классика тата хальхи музыкăпа çынсене тĕплĕнрех паллаштарасси, ачасене искусство тĕнчине явăçтарасси.
Асăннă акци вăхăтĕнче Раççейĕпех, çав шутра республикăра та, тĕрлĕ мероприятисем иртрĕç. Акă мартăн 18-19-мĕшĕсенче Шупашкарта Ходяшевсен ячĕллĕ çамрăк талантсене шыракан республикăри VII-мĕш конкурс иртрĕ. Çак конкурса чылай çул хушши ЧР Культура министерствипе Чăваш патшалăх культура институчĕн наукăпа методика пайĕ, С.Максимов ячĕллĕ ача-пăчасен музыка шкулĕ пĕрле ирттереççĕ. Унăн тĕллевĕ - пултаруллă музыкантсен Ходяшевсен ятне ĕмĕр-ĕмĕр асра тытнипе пĕрлех çамрăк талантсене тупса палăртасси, вĕсене малалла аталанма çул уçса парасси. Республикăн тĕрлĕ кĕтесĕсенчен килнĕ çамрăк музыкантсемпе пĕрлех Вăрмарти ачасен ÿнер шкулĕнче ăс пухакансем те хутшăнчĕç. Вĕсем: К.Иванова, Н.Чернова (вĕрентекенĕ О.Трифонова), Д.Викторова (вĕрентекенĕ М.Чернова). Жюри Вăрмарсен пултарулăхне тивĕçлипе хакласа грамотăсем пачĕ.
Музыка эрнинче районти ÿнер шкулĕнче те мероприятисем ирттертĕмĕр. Куракансене тĕрлĕ жанрлă юрăсемпе, композицисемпе паллаштартăмăр. Сăмахран, М.Чернова, А.Макарова, О.Трифонова, С.Васильева, А.Стрелкова йĕркеленипе фортепиано уйрăмĕнче вĕренекенсем «Манăçа тухнă ташăсен ритмĕсем» концерт-калаçу çÿллĕ шайра йĕркелесе ирттерчĕç. Менуэт, полонез, полька, вальс, шел пулин те, историе юлма пуçларĕç. Асăннă мероприяти вара пухăннисене çак ташăсен çепĕç çеммине тепĕр хут аса илтерчĕ, асра хăварчĕ. Çак уйрăмра вĕрентекенсемпе вĕренекенсем хатĕрленĕ сайд-шоу та вырăнлă пулчĕ.
Ача вăл - пуянлăх, мĕн чухлĕ шухăш вылявĕ, çĕнĕлĕх шырани унра!
Кашниех мĕн енчен те пулин чăн-чăнах пултаруллă. Пирĕн, аслисен, вĕсенче çут çанталăк панине аталантармалла. «Тĕнчене хитрелĕх çăлĕ», - тенĕччĕ классик, музыка тĕнчи вара çакна тума уйрăммăнах пулăшать. Хитре чечексем çине пăхсан эпир савăнатпăр, ачасем те, пурнăç калчисем, пире вĕсем пекех ĕмĕр тăршшĕ савăнтарччăр.