01 апреля 2011 г.
Маргарита Семенова Вăрмарти Г.Е.Егоров ячĕллĕ пĕрремĕш номерлĕ вăтам шкулта вĕреннĕ чухнех спортпа туслашнă. Çуран тата велосипедпа чупма кăмăлланă. Пиллĕкмĕш класра А.Г.Николаев космонавта халалласа шкулта ирттернĕ çăмăл атлетсен кĕркуннехи кросĕнче пĕрремĕш вырăн йышăнать. Çăмăл атлетикăпа шкул ачисем хушшинче Шупашкарта пулнă ăмăртура иккĕмĕш пулать.
2006 çулта велосипедпа чупас енĕпе Чăваш Республикин тата Раççей Кубокĕсене çĕнсе илессишĕн тĕрлĕ тапхăрти ăмăртăвĕсенче малти вырăнсене çĕнсе илет. Çиччĕмĕш класран вĕренсе тухнă хыççăн ăна Шупашкарти Олимп резервĕсен 7-мĕш номерлĕ ятарлă вăтам шкула вĕренме илеççĕ.
2007 çулта 1993-94 çулсенче çуралнă хĕр ачасем хушшинчи спорт сезонĕн итогĕсемпе пĕрремĕш вырăн йышăнать.
2007-2008 вĕренÿ çулĕн итогĕсемпе Пĕтĕм Раççейри ăмăртусенче пысăк çитĕнÿсем тунăшăн шкул дирекцийĕ М.Семенована Грамотăпа наградăланă.
2008 çулхи июлĕн 8-мĕшĕнче Раççейре мала тухассишĕн Шупашкарта ирттернĕ ăмăртăва паянхи пекех лайăх ас тăвать вăл. Çавăн чухне маунтинбайк енĕпе кросс-кантрире чупса пĕрремĕш вырăн йышăнать, спорт мастерĕн кандидачĕн нормативне пурнăçлать.
2009 çулхи спорт сезонĕнчи смотр-конкурсра аслă ушкăнри хĕр ачасем хушшинче иккĕмĕш вырăна тухать.
Иртнĕ çулхи спорт сезонне те ăнăçлă пуçлать. ЧР Кубокне çĕнсе илессишĕн Çĕнĕ Шупашкарта ирттернĕ пĕрремĕш тапхăрти ăмăртура пурне те çĕнтерет. Раççей Кубокĕшĕн Ижевскра иртнĕ тăваттăмĕш тапхăрти тупăшура иккĕмĕш пулать. Сентябрь уйăхĕнче Сочире Раççейре мала тухассишĕн иртнĕ ăмăрту халĕ те ун асĕнчех-ха. Маунтинбайк енĕпе сăрт çине хăпармалли чупура юниоркăсем хушшинче пĕрремĕш вырăна тухать. Халĕ вăл Олимп резервĕсен ятарлă шкулĕн 11-мĕш класĕнче вĕренет.
ЧР Президенчĕн Указĕпе килĕшÿллĕн çамрăксемпе студентсене творчествăра, вĕренÿре, тĕпчев ĕçĕнче, наукăра, спортра, обществăлла ĕçсенче пысăк ÿсĕмсем тунăшăн кашни çулах ятарлă стипенди параççĕ. Ку пысăк хисепе кăçал Маргарита Семенова та тивĕçрĕ. Çакă ăна спортра татах та пысăкрах çитĕнÿсем тума хавхалантарать.