29 марта 2011 г.
Районти тĕп библиотекăра Вăрмарти хурт-хăмăр ăстисен кунĕ иртрĕ. Мероприятие райадминистрацин ял хуçалăх, экологи тата çĕрпе пурлăх пайĕн тĕп зоотехникĕ О.Васильев уçрĕ.
Районти хурт-хăмăр ăстисене пыл хурчĕсем еплерех хĕл каçни пирки, вĕсемпе çуркунне-çулла вăхăтĕнче туса ирттермелли ĕçсем çинчен, хурт-хăмăра малта пыракан технологисемпе усă курса пăхасси пирки «Хурт-хăмăр агентстви» АУОăн генеральнăй директорĕ, ял хуçалăх наукисен кандидачĕ Г.Максимов каласа пачĕ, кунта пуçтарăннă хурт-хăмăр ăстисен ыйтăвĕсем çине туллин хуравсем пачĕ. Çавăн пекех вăл пуçтарăннисене пыл хурчĕсен çĕнĕ эмелĕсемпе паллаштарчĕ: «Варрасан», «Муравьинка» (пыл хурчĕсен пыйтисенчен), «Стоп-Моль «(пыл хурчĕсен лĕпĕшĕсенчен), çĕнĕ апачĕсен ячĕсене каларĕ: «Аква-корм», «Апивитаминка», «Вирусан». Вĕсене пурне те Вăрмарти тĕп пасарта пыл хурчĕсен киоскĕнче туянма пулать.
Г.Максимов районта чи лайăх ĕçлесе пыракан 4 хурт-хăмăр ăстине палăртса хăварчĕ, вĕсене тав турĕ - Арапуçĕнчи В.Ефимова, Г.Алексеевана, Кавалти Ю.Таратинана, Тикашри Н.Петрова.
Пыл хурчĕсене лайăхрах упраса хăварас, вĕсенчен ытларах пыл туса илес тесессĕн хурт-хăмăра паха йышши апатсемпе тивĕçтермелле. Çакăн йышши апат вăл чуста евĕр кандипе ковитсан. Ăна хĕл çурринчен пама пуçласан аванрах, çуркунне те, шĕвек апатсем памалли вăхăт иртерех чухне, юр чылаях чухне, памалла. Çак вăхăтра шăпах хĕлле пĕтнĕ пыл хурчĕсен йышне кĕске хушăра ÿстермелле, аталантармалла. Кандипе ковитсан тытăмне витаминпа минераллă хутăшсен тулли пуххи кĕрет, çав шутра хлор кобальчĕ те.
Çакăн йышши хутăшпа усă курсан эсир çав тери паха тата кирлĕ çурхи пыл хурчĕсене те упраса хăварма пултаратăр. Мĕншĕн тесен шăпах вĕсем, физиологи тĕлĕшĕнчен уйрăмах çирĕпрехскерсем, сивĕ кунсенче шыв патне вĕçсе тухайраççĕ, пыл хурчĕсен йăвинчи сывлăш температурине те тытса тăрайраççĕ.
Хурт-хăмăр ăсти, пуçра тыт! Паха йышши апат секреци органĕсене лайăхрах ĕçлеттерет, амалăх сĕткенне (маточное молочко) лайăхрах тухма пулăшать.