29 марта 2011 г.
Район администрацийĕн ларусен залĕнче «Раççейри пенсионерсен Союзĕ» Пĕтĕм Раççейри обществăлла организацин пирĕн районти членĕсен пухăвĕ пулса иртрĕ. Организацин иртнĕ тăватă çулхи ĕçĕ-хĕлĕпе Чăваш Енри уйрăмĕн Вăрмар районĕнчи полномочиллĕ представителĕ Р.Васильева паллаштарчĕ.
Доклада анлăн сÿтсе яврĕç. Пренире Раççей пенсионерĕсен Союзĕн членĕсем, районти Пухăвĕн делегачĕсем, Аслă Чак, Чупай, Мăнçырма ял тăрăхĕсен специалисчĕсем: Л.Федорова, Н.Иванова, Ю.Казакова тухса калаçрĕç. Вĕсем хăйсен сăмахĕсенче пенсионерсем обществăлла ĕçе хастар хутшăнни, ялăн социаллă-экономикăллă аталанăвне лайăхлатма нумай пулăшни, пуçаруллă пулни çинчен каласа пачĕç.
Раççей пенсионерĕсен Союзĕн членĕ Н.Дмитриева предприниматель ку обществăлла организацинче чи çамрăкки пулнă май, ăна пурин те пулăшмалли, медицина ĕçченĕсемпе тачă çыхăнса ĕçлемелли пирки пĕлтерчĕ.
Раççей Пенси фончĕн районти Управленийĕн начальникĕ Г.Усков Пенси законодательствинчи çĕнĕлĕхсемпе паллаштарчĕ. Унтан организацин районти уйрăмĕн Канашне 9 çынна, Раççей пенсионерĕсен Союзĕн республикăри регионти уйрăмĕн виççĕмĕш конференцине хутшăнма Вăрмар районĕнчи обществăлла организацин пуçлăхне Р.Васильевана суйларĕç.
Юлашкинчен обществăлла организацин районти уйрăмĕн кăçалхи ĕç планне çирĕплетрĕç.
Пухăва район администрацийĕн пуçлăхĕ К.Никитин хутшăнчĕ. Константин Владимирович чи малтанах районти лару-тăрупа тĕплĕн паллаштарчĕ. Унтан «Раççейри пенсионерсен Союзĕ» Пĕтĕм Раççейри обществăлла организацин районти уйрăмĕ умĕнче тăракан задачăсем çинче тĕплĕн чарăнса тăчĕ.