25 марта 2011 г.
Хăвăртрах шкула каяс, туссемпе пĕрле мероприятисенче хутшăнас, çĕнĕрен те çĕнĕ япаласем тума вĕренес килет манăн. Ăш-чик вĕресе, хăватланса пырать тейĕн. Класс ертÿçи шăп та лăп çапла пулма хистет пире яланах, хăйне кура ÿссе, аталанса пыратпăр. Кашни эрне интереслĕ, нумай енлĕ иртет. Пурнăçа та туссене те (уйрăмах улттăмĕш класс ачисене) юрататпăр, вĕсемпе хавхаланатпăр, час-часах пĕрле ĕçлетпĕр.
Мĕнле-ха капла тетĕр-и, туссем? Çапла эпир. Пире шкулта çапла воспитани параççĕ, çавăн пек условисем туса параççĕ. Эпир, пиллĕкмĕш класс ачисем, шкула çÿреме çав тери хавас. Мĕн кăна тумастпăр-ши эпир хамăрăн класс ертÿçи Светлана Васильевна Романовапа пĕрле! Кашни уйăхрах класс хаçатне кăларса тăратпăр, класри стена çинче класс пурнăçĕн йывăçне «ÿстеретпĕр». Тата уйăхсеренех лотерей выляттарассине пуçласа ятăмăр. Тата интереслĕрех пултăр тесе вылява улттăмĕшсене те явăçтартăмăр.
Январĕн 31-мĕшĕнче, сивĕ кунсене ăсатса ярас тĕллевпе, пĕрремĕш вылявне ирттертĕмĕр. Чи хаклă парнене - калькулятора - 6 класри А.Максимова тивĕçрĕ, телейлĕ пулчĕ ĕнтĕ вăл, çапах та эпир хаклă парнесем урăххисене лекнишĕн пĕрре те кулянса ÿкмерĕмĕр. Пушшех вылява малалла тăсас кăмăл çĕкленчĕ.
Иккĕмĕш вылява Юратакансен кунне халлалас терĕмĕр, февралĕн 12-мĕшĕнче ирттертĕмĕр. Ку хутĕнче билет шутне те 126 çитертĕмĕр, хаклă парнесен шутне те ÿстертĕмĕр. Пирĕн класри Таня Александрован çав тери ăнчĕ: тÿрех икĕ хаклă парни те вылярĕ унăн. Чăн та, питĕ интереслĕ пулчĕ выляма. Тепĕр вылявне вара хĕрарăмсен кунне халалласа хатĕрлентĕмĕр. Ятарласа аннесем валли ÿкерчĕксем хатĕрлерĕмĕр, хамăр алăпа открыткăсем, парнесем ăсталарăмăр, сăвă-калав çыртăмăр, хаçат кăлартăмăр. Чунтан юрататпăр-çке аннесене, савăнтарас, тав тăвас терĕмĕр. Малтанах 6-мĕш класс ертÿçи Л.Виноградова пирĕнпе уяв викторинине туса ирттерчĕ. Вара вылява куçрăмăр. Ку хутĕнче билетсен шутне 144 çитертĕмĕр, суперпризсене пилĕк ача тивĕçрĕç: улттăмĕшсем - В.Валькина, А.Максимова, А.Ямукова, А.Петров тата пирĕн класри И.Валькин.
Космонавтика кунĕ çывхарса килнине кура тепĕр вылявне тата интереслĕрех хатĕрлес тетпĕр.