22 марта 2011 г.
Карăкçырмари Культура çурчĕ умне халăх хаваспах йышлă пуçтарăнчĕ. Хĕле лайăх ăсатса ярас шутпа тĕрлĕ мероприятисем иртрĕç. Уйрăмах кĕçĕн класра вĕренекенсем активлă хутшăнчĕç тĕрлĕ конкурссене.Канат туртассипе, кире пуканĕ йăтассипе хĕрсем, каччăсем, аслăраххисем призсем çĕнсе илессишĕн ăмăртрĕç.
Карăкçырма ялĕнче çуралса ÿснĕ Татьяна Петровапа эпир мухтанатпăр. Кăçалхи февралĕн 27-мĕшĕнче Японире иртнĕ Пĕтĕм тĕнчери сумлă марафонра пирĕн ял хĕрĕ Таня виççĕмĕш вырăн йышăнма пултарчĕ.
Шăпах унăн призĕсене çĕнсе илессишĕн йĕлтĕр ăмăртăвĕ иртрĕ. Кĕçĕн класра вĕренекенсем хушшинче В.Алексеев пĕрремĕш, Н.Александров иккĕмĕш, А.Чернов виççĕмĕш вырăнсене çĕнсе илчĕç. Аслăрах классенче вĕренекенсем хушшинче В.Гурьев пĕрремĕш, П.Яковлев иккĕмĕш, С.Иванов виççĕмĕш вырăнсене йышăннă. Арçынсемпе каччăсенчен вара В.Алексеев – пĕрремĕш, А.Романов – иккĕмĕш, С.Яковлев виççĕмĕш вырăнсене çĕнсе илнĕ. Вырăн йышăнакансене укçан парса хавхалантарчĕç. Культура çурчĕ çывăхĕнче паллă спортсменкăн ашшĕпе амăшĕ ял-йыш валли çуллă икерчĕсем пĕçерсе вĕри чейпе, шашлăкпа сăйларĕç. Çапла вара эпир Таня Петровăпа унăн ашшĕпе амăшĕ пулăшнипе хĕле питĕ лайăх ăсатса ятăмăр.