22 марта 2011 г.
«Урмарская» ăратлă кайăк-кĕшĕк фабрики» акционерсен уçă обществинче иртнĕ пухура виçĕ ыйту пăхса тухрĕç. Пĕрремĕшĕ вăл 2010 çулта йышăннă коллективлă килĕшĕве мĕнле пурнăçласа пыни тата 2011 çулхи коллективлă килĕшĕве хушусем кĕртсе йышăнасси пулчĕ. Çавăн пекех «Пĕрлĕхлĕ Раççей» партийĕн вырăнти пуçламăш организацин отчетне те итлерĕç.
Пухăва райадминистрацин ял хуçалăх, экологи тата çĕрпе пурлăх пайĕн тĕп агрономĕ Н.Николаев, Кивĕ Вăрмар ял тăрăхĕн пуçлăхĕ Н.Борисов, «Урмарская» ăратлă кайăк-кĕшĕк фабрики» акционерсен уçă обществин генеральнăй директорĕ Н.Петров хутшăнчĕç. Ăна профсоюзăн пуçламăш организацийĕн председателĕ Г.Петров уçрĕ, 2010 çулта йышăннă коллективлă договора мĕнле пурнăçласа пынипе паллаштарчĕ. Вăл палăртнă тăрăх хальхи вăхăтра асăннă обществăра 145 çын тăрăшса вăй хурать. Вĕсен тĕп тĕллевĕ - хуçалăх экономикине, ĕçе вăхăтра тата пахалăхлă пурнăçласси. «Асăннă обществăн администрацийĕпе коллективĕ хушшинчи хутшăнусем пĕтĕмпех коллективлă килĕшÿпе пулса пыраççĕ. Иртнĕ çул уйăхри вăтам ĕç укçи 8593 тенкĕпе танлашнă. Хуçалăх çулсеренех пурлăхпа техника базине вăйлатсах пырать. Иртнĕ çул çĕнĕ комбайн, сеялка тата ытти хуçалăхра кирлĕ техника туяннă. Чăх-чĕп цехĕнче, хур ферминче çĕнĕ оборудованисем вырнаçтарнă. Иртнĕ çул ял хуçалăх ĕçченĕшĕн уйрăмах йывăр пулчĕ пулин те, пирĕн коллектив пуçа усмарĕ, йывăрлăхсене çĕнтерсе ял хуçалăх ĕçĕсене вăхăтра пурнăçларĕ. Кунта обществăн генеральнăй директорĕн Н.Петровăн тÿпи те пысăк. Вăл коллектива тĕрĕс йĕркелесе пынипе хуçалăх паян ура çинче çирĕп тăрать», - терĕ Г.Петров.
Ĕç условийĕсене çăмăллатассипе те пысăк тимлĕх уйăраççĕ. Сывлăха сиен кÿрекен ĕç вырăнĕсенче тăрăшакансене хушма ĕç укçи çумне çăмарта, сĕт уйăрса параççĕ. Отпуска каякансене материаллă пулăшупа тивĕçтереççĕ. Унсăр пуçне кунта ĕçлекенсене вăл е ку ĕçе пурнăçлама çурма хакпа автотранспорт уйăраççĕ. Кашни çулах лайăх, тăрăшса вăй хуракансене утă, улăм, тыр-пул параççĕ. Çурхи тата кĕрхи ĕçсенче апатлантарасси çурма хакпа тата тÿлевсĕр пулса пырать. Кадрсен пĕлĕвне ÿстерессипе те тимлеççĕ. Специалистсене кашни çулах пĕлĕве ÿстерекен курссене вĕренме яраççĕ. Кашни çулах рабочисене ятарлă ĕç тумĕпе тивĕçтереççĕ. Юбилей тата ытти паллă уявпа чысласси асăннă обществăра йăлана кĕнĕ. Районти шкулсемпе те тачă çыхăну тытаççĕ. Çуллахи вăхăтра шкул ачисем хуçалăха тĕрлĕ ĕçсем туса пулăшаççĕ. Ял хуçалăх ĕçĕсене кăмăллакан çамрăк ăру кашни çулах аслă вĕренÿ учрежденийĕсене пĕлÿ пухма кĕрет. Хуçалăх ку енĕпе пысăк тимлĕх уйăрать. Пĕтĕмĕшле каласан иртнĕ çул йышăннă коллективлă килĕшĕве пĕтĕмпех пурнăçланă. Коллективлă килĕшĕве мĕнле пурнăçласа пынипе асăннă хуçалăхăн экономисчĕ Е.Тимофеева, тĕп агрономĕ В.Нарзаев тухса калаçрĕç, лайăх хак пачĕç.
Общество ĕçченĕсем 2011 çулхи коллективлă килĕшĕве пăхса тухрĕç, хушусем кĕртсе йышăнчĕç.
«Урмарская» ăратлă кайăк-кĕшĕк фабрики» акционерсен уçă обществин генеральнăй директорĕ Н.Петров иртнĕ çулхи ял хуçалăхĕнче пурнăçланă ĕçсене пĕтĕмлетрĕ, малашлăх задачисене палăртрĕ. «2010 çул ял хуçалăх ĕçченĕсемшĕн йывăр çул пулчĕ пулин те, эпир начар мар кăтартусем турăмăр. Çак вăхăтра 3 миллион та 820 пин çăмарта, 113 тонна сĕт, 470 тонна аш-какай туса илнĕ. 1300 гектар çинче кĕрхи тĕш тырă акса хăварнă. 1414 тонна тĕш тырă туса илнĕ, тухăç пĕр гектартан 25,7 центнерпа танлашнă. 66 миллион та 600 пин тенкĕлĕх продукци реализациленĕ. Таса тупăш 4 миллион та 200 пин тенкĕпе танлашнă. Кăçал çанталăк условийĕсем лайăх пулсан тупăш тата та ытларах илес тĕллевлĕ. Хальхи вăхăтра 150 тонна элита вăрлăх туянтăмăр. Кăçал усă курман çĕрсене пусă çаврăнăшне кĕртсе тĕш тырă тата пăрçа йышши культурăсем ытларах акма планланă», - терĕ Николай Петрович хăйĕн сăмахне пĕтĕмлетсе.
Пухура çавăн пекех Н.Петров «Единая Россия» партин хуçалăхри пуçламăш организацийĕ туса ирттернĕ ĕç-хĕлпе паллаштарчĕ. Унтан асăннă партин районти конференцине делегатсем суйларĕç.