18 марта 2011 г.
Районта иртнĕ Пĕрлехи информаци кунне ЧР Патшалăх Канашĕн Председателĕн заместителĕ Г.Васильев, РФ Суд департаменчĕн Чăваш Республикинчи Управленийĕн начальникĕ В.Петров, ЧР Вĕрентÿпе çамрăксен политикин министерствин надзорпа контроль управленийĕн начальникĕ М.Федотов тата ытти яваплă çынсем хутшăннă. Унăн тĕп темисем: вырăнти хăй тытăмлăх органĕсем çурхи ейĕве хатĕрленессипе ĕçсем туса ирттересси, пушар хăрушсăрлăхне вăйлатасси, тавралăха тирпей-илем, хăтлăх кĕртесси, çурхи ĕçсене тивĕçлĕ шайра ирттересси, усă курман çĕрсене пусă çаврăнăшне кĕртесси.
Чи малтанах ĕçлĕ ушкăн Вăрмар район администрацийĕн пуçлăхĕпе К.Никитинпа тĕл пулнă, унтан палăртнă ял тăрăхĕсене çитсе унти граждансемпе тĕрлĕ ыйтусене сÿтсе явнă.
Аслă Чак ялĕ. ЧР Патшалăх Канашĕн председателĕн заместителĕ Г.Васильев ертсе пыракан ушкăн Аслă Чак ял тăрăхĕнче пулса унти граждансемпе тĕл пулчĕ. Ял тăрăхĕн администрацийĕнче пулчĕ ĕçлĕ калаçу. Аслă Чак ял тăрăхĕн пуçлăхĕ А.Иванов Пĕрлехи информаци кунĕн асăннă темисемпе хальхи вăхăтра мĕнлерех ĕçсем туса ирттернипе паллаштарчĕ, малашлăх задачăсене палăртрĕ. «АгроЧаки» тулли мар яваплă обществăн директорĕ В.Иванов тата В.Семенов тĕп агроном хуçалăх аталанăвĕ тата çурхи ака ĕçĕсем çинче тĕплĕн чарăнса тăчĕç. Генрих Васильев ака ĕçĕсене пурнăçламашкăн элита вăрлăхĕсемпе ытларах усă курмаллине каларĕ. Ĕçлĕ ушкăн çавăн пекех «Çемьесене тата ачасене пулăшу паракан Вăрмарти социаллă центр» республикăри патшалăх учрежденийĕнче пулса унти ĕç-хĕлпе тĕплĕн паллашрĕç. Район администрацийĕн пуçлăхĕ К.Никитин палăртнă тăрăх, кунта пысăк калăпăшлă ĕçсем пурнăçланă. Хальхи вăхăтра пÿлĕмсене тирпейлес, хăтлăх кĕртес ĕç пырать. Çитес вăхăтра кунти ĕçченсем ачасене йышăнма хатĕрленеççĕ. Çавăн пекех ĕçлĕ ушкăн пĕтĕмĕшле пĕлÿ паракан тĕп шкулта, ял библиотекинче, почтăра, лавккасенче пулса курчĕ, вырăнти халăха Пĕрлехи информацин тĕп темисемпе паллаштарчĕ.
Арапуç ялĕ. РФ Суд департаменчĕн Чăваш Республикинчи Управленийĕн начальникĕ В.Петров ертсе пыракан ушкăн Арапуç ял тăрăхне çитсе унти ĕç-хĕлпе тĕплĕн паллашрĕ. Чи малтанах ял тăрăхĕн администрацийĕнче Пĕрлехи информацин тĕп темисене сÿтсе яврĕç. Ял тăрăхĕн пуçлăхĕ А.Агеев çурхи ейĕве хатĕрленсе тĕрлĕ ĕçсем туса ирттерни çинчен каларĕ. Асăннă ял тăрăхĕнче 2 плотина тата 5 кĕпер шутланать. Вĕсене пурне те юртан хырса тасатнă, шыв юхса тăракан пăрăхсене уçнă. Ял тăрăхĕнче пушар хăрушсăрлăхĕпе тивĕçтерессипе ятарласа пушар машини пур. Усă курман çĕрсене пусă çаврăнăшне кĕртессипе те ĕçлеççĕ кунта. Кашни çулах тĕш тырă, пахча çимĕç, çĕр улми лартассипе тăрăшса вăй хураççĕ. Хальхи вăхăтра официаллă майпа регистрациленĕ икĕ фермер хуçалăхĕ çĕрпе ĕçлет. Çитес вăхăтра тата тепĕр фермер çак ĕçе пуçăнмалла. Асăннă ял тăрăхĕнче уйрăм çын предпринимательсем 44 шутланаççĕ. «Арабоси» агрофирма хавшани вара кунта пурăнакансене пăшăрхантарать. Ĕçлĕ ушкăн çавăн пекех Культура çуртĕнче, музейре, пĕтĕмĕшле пĕлÿ паракан тĕп шкулта пулса унти халăхпа тĕл пулса Пĕрлехи информаци кунĕн тĕп темисене сÿтсе яврĕ.
Çавăн пекех Пĕрлехи информаци кунĕ Энтрияль ял тăрăхĕнче те иртрĕ. Ăна «Вăрмарти çĕвĕ фабрики - ОВАС» тулли мар яваплă обществăра пĕтĕмлетрĕç. Кунта ĕçлĕ ушкăн асăннă предприятин генеральнăй директорĕпе А.Лукинпа тĕл пулчĕ, фабрика аталанăвĕн малашлăх планĕсемпе паллашрĕ.