18 марта 2011 г.
Арапуç ял библиотеки 1961 çултанпа ĕçлет. Малтанласа унăн фондĕнче 1433 кĕнеке шутланнă. Чи пирвайхи заведующийĕ Раиса Петровна Васильева (Петрова) пулнă. Уçăлнăранпа библиотека хăйĕн вырăнне 3 хутчен улăштарать. Чăн малтанах вăл йывăç çуртра вырнаçать. 1966 çулта щитлă çурта куçать. 1972 çулта, икĕ хутлă Культура çурчĕ çĕкленсен, кунтах библиотека валли ятарласа вырăн уйăраççĕ. 2008 çулта библиотека Культура çурчĕн 2-мĕш хутне хăпарать. Унăн лаптăкĕ те ÿсет, халĕ вăл 132 тăваткал метр йышăнать.
2006 çулхи мартăн 22-мĕшĕнче библиотека «тĕслĕх библиотека» ятне тивĕçет. Вăл çĕнĕ технологин пур йышши оборудованипе пуянланать: компьютер, принтер, сканер, телевизор, видеомагнитофон.
Библиотекăра тĕрлĕ çулсенче В.Рикована, В.Иванована, Н.Соколована, С.Михайлована ĕçре пысăк пуçарулăх кăтартнăшăн Хисеп грамотипе наградăлаççĕ. 1979, 1982 çулсенче вулавăш «Лайăх ĕçлекен библиотека» ята тивĕçет. 1996, 2003 çулсенче С.Михайлова «Çулталăкри библиотекарь» конкурса хутшăнса 3-мĕш вырăн йышăнать.
2005 çултанпа кунта маттур Н.Васильева вăй хурать. Вăл 2010 çулта районти «2010 çулхи чи лайăх культура ĕçченĕ» конкурса хутшăнса пĕрремĕш вырăн çĕнсе илет. Н.Васильева тĕрлĕ мероприятисем ирттерет, тематикăлла стендсем йĕркелет: «Фотолетопись библиотеки», «Театр книги Непоседы», «Звездные моменты библиотеки». Кунта ачасем валли «Ача-пăча кĕтесĕ», «Вулама сĕнетпĕр», «Справочная литература» кĕтессем пур. Çавăн пекех «Шăпăрлан» клуб ĕçлет.