11 марта 2011 г.
«Артистăн пĕтĕм пурнăçĕ вăл тунă рольсенчен тытăнса тăрать. Çак çирĕм ытла çул хушшинче çĕр ытла роль вылярăм. Кашнийĕ пурнăç тĕпренчĕкĕ, кашни ролĕ чĕрере. Юлашки çулсенче тунă сăнарсем çаксем: белорус драматургĕ Дудаев çырнă «Каçкÿлĕм» спектакльти Мультик. Ку спектакле телевизорпа та кăтартрĕç. Разумовская çырнă «Ашшĕпе йăмăкĕ» пьеси тăрăх лартнă спектакльти Марк. Çак ĕçе те телекурăмпа кăтартрĕç. Ытти нумай-нумай роле асăнма пулать».
Василий Павлов çырăвĕнчи сăмахсем вунă çул каяллах çырнăскерсем пулсан та, пĕрре те кивĕлмен.
«Ялав» журналта Çамрăксен театрĕн спектаклĕ хыççăн куракансен калаçăвне илсе кăтартнăччĕ. Ак унти йĕркесем: «Шупашкарти савни», «Шăматкун каçхине» камитсене куртăмăр. Василий Павлов выляни питĕ килĕшрĕ. Юррисем уçă, калаçни хитре».
«Ачаранпа, вун çичĕ çул çÿретĕп. Çамрăксен театрне. Çавăнтанпа паллатăп Василий Павлова. «Çуллахи каçра» курнăччĕ. Тата темĕнле спектакльте те. Ялан лайăх, чĕрене тивмелле вылять».
«Ку артиста килĕштерсе пăхнă май: хăш ялтан-ши, ăçта вĕреннĕ-ши, кам ачи-ши? - тесе шухăшлатпăр. Ашшĕ-амăшĕ хĕпĕртесе ларать пуль ывăлĕ вылянине курса, тетпĕр. Юратмалла ăна, чăнах та».
Вăхăт тени хĕвелпе тăванлă. «Хĕвел тухрĕ, хĕвел анчĕ, кун иртрĕ», - тесе юрланă ваттисем. Ак тин çеç шкул ачиччĕ, курăсăн: ÿссе çитĕнтĕмĕр, вăхăт еккипе пурнăç кустăрми малаллах шăвать.
Вася Павлов - Кĕтеснерти шкул ачи. Учитель Ваççана хитре ÿкеретĕн тесе хавхалантарсах тăрать, ÿссен художник пулăн-ха тесе кăмăлне çĕклет.
Çут çанталăка сăнарлă курма пĕлни урăх ĕçре пулăшать, кĕтмен-туман çĕртен Вася Павлов артист пулса тăрать.
Акă пĕрремĕш роль. «Кĕлпике» юмахра асамçă пулма вĕренекен Паж сăнарне кăтартмалла. Ăнăçлах иртет спектакль, лачкам тара ÿкнĕ çамрăк артиста аслисем алă тытсах саламлаççĕ.
1971 çулта В.Павлова Çамрăксен театрне куçма ÿкĕтлеççĕ. Уйрăмах Л.Родионов режиссер «евчĕ» пулса тăрăшать.
«Ÿссех пыратăн вĕт», - тет вăл шÿтлесе. - Кĕлеткÿпе мана хăваласа çитсе пыратăн. Сан пек йăрăс каччăсем кирлĕ пире. Куракансене илĕртме хитре спектакльсем калăплăпăр».
Халиччен пуканесене выляттарса калаçнипе танлаштарсан, Çамрăксен театрĕнче ĕçлесси чылай йывăртарах пулнă. Пысăк сцена çине тухса сăнара ăста кăтартас тесен юрлама та, ташлама та, тĕрлĕ-тĕрлĕ хусканусем тума та пултармалла иккен. Дебют ăнăçлă иртет Василий Павловăн, «Çамрăклăх çеçкере» спектакльте тĕп геройсенчен пĕрне - Петĕр рольне ăста выляса кăтартать. Унтанпа кашни çулах çĕнĕ спектакльсем, çĕнĕ рольсем.
Артист вылянă тĕп рольсене асăнар-ха: «Ялта» - Ванюк, «Аслă ывăл» - Бусыгин, «Юратма пĕлекенсем телейлĕ» - Ильин, «Туй каçĕ» - Артур, «Вăрланă телей»– Михайло, «Çĕпĕр дивизийĕ» - Якур мучи, «Шупашкарти савни» - Çтаппан тата ыттисем те. В.И.Павловăн чи ăнăçлă ролĕсенчен пĕри вăл - Е.Еллиевăн «Пирĕн телей çавнашкал» драми тăрăх лартнă спектакльте Çемен ролĕ. Чăвашлăх арканни, халăхăн нацилле сăн-сăпачĕ йăшни - çак ыйтусем хумхантараççĕ Çемене. Артист çавна витĕмлĕ сăнарлама пултарнă. Е тата М.Угаринăн «Ах, кăйкăрăм» спектакльти военком сăнарĕ. Артист кунта та чăвашлăх ыйтăвне хускатакан сăнара ăста кăтартать. Çулсерен гастроль маршручĕсем те анлăланаççĕ. Чăваш артистчĕсене аякра та, çывăхра та пурăнакан йăхташăмăрсем кĕтеççĕ. Мускавĕ, Санкт-Петербургĕ йыхравлать. Апла пулин те, Раççей Федерацийĕн тава тивĕçлĕ артисчĕ (2008 ç.), Чăваш халăх артисчĕ, ентешĕмĕр, Кĕтеснер чăвашĕ Василий Иванович Павлов хамăр ене çÿремешкĕн май самантне тупатех. Акă вĕсем, виçĕ пĕртăван. Фаина Ивановна, Николай Иванович, Василий Иванович, артист пулса тăнăскерсем, тăван ял-йыш ытамне лекеççĕ, карталанса чăваш юрри янăратаççĕ.