11 марта 2011 г.
Почта ĕçченĕсен алли витĕр çынсен шăписем тухаççĕ, кашни çырура, почта карточкинче, открыткăра е маркăра çĕршыв историйĕ пурăнать. Çавăнпа та почтăн тата республикăри музейсен пĕрле хутшăнса ĕçлемешкĕн сăлтавсем тата пуян опычĕ пур.
Çакă пĕлтĕр Аслă Отечественнăй вăрçăра çĕнтернĕренпе 65 çул çитнине халалланă куравра уйрăмах лайăх палăрчĕ. Ятарласа çак кун валли Раççей почтин Чăваш Республикинчи управленийĕ тата Наци музейĕ республика çыннисем валли хăйне евĕрлĕ почта карточкисен тата вăрçă вăхăтĕнчи виçĕ кĕтеслĕ çырусен çав тери интереслĕ экспозицине хатĕрленĕ. Чылай вăхăт иртнипе тĕксĕмленнĕ, кивелнĕ çак хут листисем çинчи кашни йĕрке чуна пырса тивет. Курав презентацийĕ Пĕтĕм тĕнчери музейсен кунĕнче 2010 çулхи майăн 15-мĕшĕнче иртнĕ. Çак кун наци музейĕ тата Раççей почти Чăваш Енре пуçласа «Музейсен каçĕ» акци йĕркеленĕ. Асăннă кун музее килнĕ кашни çын фронт почтин экспозицийĕпе тÿлевсĕрех паллашма тата хăйне евĕрлĕ виçĕ кĕтеслĕ çыру яма пултарнă.
Тата маларах Раççей почтин республикăри управленийĕ Космонавтика музейне почта конверчĕсен космос темипе пухнă коллекцине парнеленĕ, Шуршăл ялĕнчи Космонавтика музейне сăнланă почта карточки тата Андриян Григорьевич Николаев портретне лартнă конверт кăларнă, ятарлă асăнмалăх штемпель хатĕрленĕ. Ку штемпельпе кашни çулах Космонавтика кунĕнче тата виççĕмĕш космонавт çуралнă кун çырусемпе открыткăсем çине асăнмалăх штамп лартаççĕ.