11 марта 2011 г.
Районти Спорт çуртне хăпартса лартнăранпа (1981 ç.) кăçал 30 çул çитет. Вуншар-вуншар спорт мастерĕпе кандидатне хатĕрленĕ кунта. Вĕсенчен пĕри - Кивĕ Вăрмарта çуралнă Ю.Васильев спорт мастерĕ.
Унăн спортри пултарулăхĕ 1981 çулта уйрăмах палăрма пуçланă.
Асăннă çулăн июнĕн 22-24-мĕшĕсенче Вăрмар поселокĕнче ялсенчи çуллахи спорт вăййисен IV программипе килĕшÿллĕн «Урожай» ирĕклĕ спорт обществинче республикăра мала тухассишĕн велосипедистсен ăмăртăвне ирттернĕ. Малтанхи кунĕнче 25 километра уйрăммăн чупса ăмăртнă. Çак дистанцие Юрий 41 минут та 17 çеккунтра чупса тухнă, юниорсем хушшинче виççĕмĕш вырăн йышăннă.
Тепĕр кунне спортсменсем командăпа 50 километра чупнă. Вăрмарсем çак дистанцие 1 сехет те 20 минут та 35 çеккунтра вĕçленĕ, иккĕмĕш вырăн йышăннă.
Виççĕмĕш кунне ушкăнпа 75 километра чупса виççĕмĕш вырăна тивĕçнĕ пулнă.
Ун хыççăн тĕрлĕ хуласенче иртнĕ ăмăртусенче - Адлерта, Георгиевскра, Сочире, Куйбышев, Воронеж облаçĕсенче тата ытти çĕрте те ÿсĕм хыççăн ÿсĕм тунă.
РСФСРта мала тухассишĕн Георгиевск хулинче шоссе çинче ушкăнпа 150 километра чупассипе ирттернĕ ăмăртура Юрий Васильев СССР спорт мастерĕн нормине пурнăçланă.
Шел, пултаруллă спортсмен пирĕнтен ир уйрăлса кайрĕ, анчах унăн сăнарĕ юлташĕсен асĕнче чылайччен упранĕ.