11 марта 2011 г.
1981 çулхи январь уйăхĕнче Адлерта çĕршыври велокроссменсен чемпионачĕ пулса иртнĕ. Унта пирĕн республикăран вунвиçĕ спортсмен хутшăннă. ЧАССР команди пĕрремĕш вырăн йышăннă, СССР Министрсен Совечĕ çумĕнчи физкультурăпа спорт комитечĕн пĕрремĕш степеньлĕ дипломне илме тивĕçлĕ пулнă.
Чăваш педагогика институчĕн студенчĕ В.Гавриловăн çитĕнĕвне уйрăмах палăртмалла. Вăл малтанхи кун, ушкăнпа старт илсе чупнă чухне, финиша чи малтан çитнĕ. Сăртлă-туллă 21 километр та 600 метрлă дистанцие çĕнтерÿçĕ 1 сехет те 29 минутра вĕçленĕ. Иккĕмĕшпе виççĕмĕш вырăнсене те пирĕн спорт мастерĕсемех - хамăр районти И.Ивановпа промышленность тракторĕсен заводĕнче ĕçлекен А.Савельев йышăннă.
Иккĕмĕш кун кроссменсем уйрăмшарăн, пĕрин хыççăн тепри, 15 çеккунт иртсен старта тухса ăмăртнă. В.Гаврилов ку хутĕнче те пултаруллă пулнă: финиша чи малтан çитнĕ. Призерсен ятне каллех И.Ивановпа А.Савельев çĕнсе илнĕ.
Юниорсем те начар мар результатсем кăтартнă. Вăрмар каччисем В.Кирилловпа Ю.Павлов тата Шупашкарти Г.Илехматов вăйлисен шутне кĕме пултарнă.