11 марта 2011 г.
Тăвай районĕнчи Çĕнĕ Пуянкасси ялĕнчи Сильвия Петровашăн çак кунсем ĕмĕрлĕхех асра юлĕç. Çĕршывăн тĕп хулине пĕрре те кайса курманскер тÿрех «Пĕрремĕш каналта» пулнă, артистсене, спортсменсене тата ытти паллă çынна хăй куçĕпе курнă çеç мар, вĕсемпе пĕрле «телевизора та лекме» пултарнă вăл. Чăваш хĕрĕ «Талисмания. Сочи-2014» передачăна хутшăннă.
Февралĕн 26-мĕшĕнче 2014 çулхи Олимпиада талисманне пĕтĕм çĕршыв суйларĕ. Шухăшне те ахаль çынсенченех пуçтарнă. Иртнĕ çулхи сентябрĕн 1-мĕшĕнче пуçланнă конкурс виçĕ уйăх пынă, унта кирек кам хутшăнма пултарнă, професси те, миçе çулти те пĕлтерĕшлĕ мар. Ачаранпах ÿкерме юратакан Сильвия хăйĕн талисманне юлашки кун çеç темиçе сехетре ÿкернĕ. Хатĕр ÿкерчĕке электронкăпа Мускава ярса панă вăл, тепĕр икĕ уйăхран вара унăн мулкачĕ 24 пин ĕç хушшинче финала тухнине пĕлтернĕ, хĕре Мускава чĕннĕ.
Çĕршывăн тĕп хулине Сильвия ашшĕпе кайнă, кунта вĕсене «Сочи-2014» йĕркелÿ комитетне экскурсие илсе кайнă. Тепĕр кунхине вара тÿрĕ эфирта пĕтĕм çĕршыв Олимпиада тата Параолимпиада талисманĕшĕн сасăланă. Çĕнĕ Пуянкассинче СМС яман, ятарлă номерпе шăнкăравламан çын юлман та. Чăваш хĕр ачи сĕннĕ вăрманти академире «пиллĕксемпе» çеç вĕренекен, амăшне пулăшакан, юрлама-ташлама юратакан, спортпа туслă мулкач майлă А.Сихарулидзепе Н.Валуев пулнă, вĕсемпе пин-пин куракан килĕшнĕ курăнать, унсăрăн леопардпа шурă упа хыççăн виççĕмĕш пулаяс çукчĕ. Тÿрĕ эфирта И.Ургант куракансене 62 процент çак виçĕ талисманшăн сасăланине пĕлтерсе жюри членĕсем (сăмах май, вĕсен хушшинче паллă, сумлă çынсем - К.Эрнст, Ю.Башмет, Ф.Бондарчук, Н.Дроздов, С.Журова, Т.Навка) вĕсем пурте 2014 çулхи Олимпиада талисманĕсем пулассине çирĕплетнĕ. Эппин, пирĕн ентешĕн шухăшĕпе ăсталанă мулкачсем, унпа илемлетнĕ сувенирсем тепĕр виçĕ çултан тĕнчипех саланĕç. Тăван ялне Сильвия талисмансен конкурсĕн финалисчĕ пулнине çирĕплетекен медаль, тĕрлĕ парне илсе килнĕ. Чи хакли вара - Олимпиадăна уçнă çĕре хутшăнма май паракан сертификат.