25 февраля 2011 г.
«Йăла ыйтăвĕсене тивĕçтерекен комбинат» муниципаллă унитарлă предприяти халăха тÿлевлĕ пулăшу ĕçĕсем парассине тĕллевлĕ пурнăçласа пырать. Акă сехетсем юсакан уйрăмах илер-ха. Кунта Эльза Александровна Сорокина 30 çул ытла мастер пулса вăй хурать. Хăйĕн ĕçне вăл тÿрĕ кăмăлпа, пахалăхлă пурнăçласа пырать. Клиентсем те ун ĕçĕпе кăмăллă. Çавăн пекех атă-пушмак юсакан Василий Романович Куприн ăсталăхне те палăртмалла. Пултаруллă специалист клиентсен ыйтăвне туллин тивĕçтерме тăрăшать.
Çĕвĕ цехĕнче тăрăшакан Галина Николаевна Данилова касса хатĕрлекен кунта 1980 çултанпа вăй хурать. Вăл хатĕрленĕ изделисене çĕвĕçсем çĕлеççĕ. Клиентсем заказ панă кашни япалана Г.Данилова пысăк тăрăшулăхпа пурнăçлать. Çавăншăн ăна хисеплеççĕ, заказсем те чылай параççĕ.
Çитес вăхăтра асăннă предприятире кулленхи пурнăçра усă куракан техникăна юсассипе уйрăм уçма палăртаççĕ. Енчен те сирĕн тĕрлĕ тĕслĕ телевизор, компьютер, карас телефон тата ытти йышши оргтехника юрăхсăра тухрĕ пулсан, кунта сирĕн ыйтăва пĕтĕмпех тивĕçтерĕç. Унсăр пуçне нумай канал тытакан спутник антеннисене (триколор) вырнаçтарма, юсама пулать. Пĕтĕмĕшле каласан асăннă предприятисен алăкĕсем сире валли яланах уçă.