Публикации » Вăрçă хыçра, анчах вăл асра

18 февраля 2011 г.

Февралĕн 15-мĕшĕнче Раççейре çĕнĕ дата паллă тăваççĕ – Çар тивĕçне Тăван çĕршыв тулашĕнче пурнăçланисене асăнмалли кун. Çак куна шăпах февралĕн 15-мĕшĕнче – Совет çарĕсене Афганистан çĕрĕ çинчен илсе тухнă кун паллă тума йышăннă. Вăрмар поселокĕнчи интернационалист-салтаксене асăнмалли палăк умĕнче митинг иртрĕ. 22 çул каялла пынă юнлă вăрçа пирĕн районтан 200 яхăн çамрăк хутшăннă. Паянхи кун та çапăçу хирĕнче пуçĕсене хунă Вăрмар çĕрĕн каччисем асран тухмаççĕ. Митингра Вăрмар хула тăрăхĕн пуçлăхĕ В.Иванов, Чăваш Республикин Çар ĕç комиссариачĕн Вăрмар тата Куславкка районĕсен пай пуçлăхĕ М.Пуклаков, райадминистрацин вĕрентÿпе çамрăксен политикин пайĕн начальникĕ Ю.Соколов, Афган вăрçин ветеранĕсен канашĕн председателĕ О.Ильин сăмах тухса каланă. Çак мероприятие халалласа райадминистрацин пуçлăхĕн Кубокне çĕнсе илессишĕн предприятисемпе организацисен, учрежденисен хула тата ял тăрăхĕсен, шкулсен командисем хушшинче физкультурăпа спорт Спартакиади шутĕнче Г.Е.Егоров ячĕллĕ пĕрремĕш вăтам шкулта командăсем пăшалтан перессипе ăмăртнă.