15 февраля 2011 г.
Февралĕн 5-мĕшĕнче Шăхальти пĕтĕмĕшле пĕлÿ паракан тĕп шкулта Афганистанра пуçне хунă Хĕрлĕ Çăлтăр орденĕн кавалерне (вилнĕ хыççăн панă) Юрий Георгиевич Иванова асăнса волейбол турнирĕ иртрĕ. Чаплă лару-тăрăва уçма район администрацийĕн пуçлăхĕ К.Никитин, Вăрмар район пуçлăхĕ В.Павлов, райадминистрацин вĕрентÿпе çамрăксен политикин пайĕн начальникĕ Ю.Соколов, Чăваш Республикин Çар ĕç комиссариачĕн Вăрмар тата Куславкка районĕсен пай пуçлăхĕ М.Пуклаков, Афган вăрçин ветеранĕсен канашĕн председателĕ О.Ильин хутшăннă. Ун хыççăн шкул стени çумне Ю.Иванова ĕмĕр-ĕмĕр асра тытас пĕлтерĕшпе асăну хăми вырнаçтарнă.
Ăмăртури çивĕч тупăшура асăннă паттăрăн ячĕллĕ куçса çÿрекен кубока Шăхаль ял тăрăхĕн спортсменĕсем çĕнсе илнĕ. Иккĕмĕш вырăнта - Тикашсем, виççĕмĕшĕнче - Кĕтеснерсем. Тăваттăмĕш вырăна Шăхальти пĕтĕмĕшле пĕлÿ паракан тĕп шкулта вĕренекенсем тухнă.