25 января 2011 г.
Кăçалхи уяр та шăрăх çанталăк тыр-пула ĕнтсе типĕтсе янисĕр пуçне тепĕр инкек илсе килчĕ: Раççейĕн тĕрлĕ кĕтесĕсенче, çав шутра Чăваш Енре те, вăрмансенче пушарсем алхасрĕç. «Хĕрлĕ автан» Шупашкар, Улатăр хулисемпе Киря, Буинск , Йĕпреç поселокĕсен çывăхĕнчи тата Атăл леш енчи Йăлăмри вăрмансенче «ташларĕ». Чăваш Республикин Чрезвычайлă лару-тăру енĕпе ĕçлекен патшалăх комитечĕ, Раççей МЧСĕн республикăри Тĕп управленийĕ çак кăткăс лару-тăрура вăйсене пĕрлештерни, çынсене кар çĕклени, ятарлă техникăна пушара сÿнтерме явăçтарни вут-çулăма сарăлма памарĕ. Паллах чи йывăр çĕклем пушар хуралĕн ĕçченĕсем çине тиенчĕ. Пушара сÿнтерес ĕçре пирĕн районтан 39 номерлĕ пушар чаçĕн коллективĕ те хастар хутшăннă. Эрни-эрнипех пирĕн ентешсем вахта мелĕпе улшăнса Атăл леш енчи Йăлăмра вут-çулăмпа кĕрешрĕç, ăна парăнтарма пултарчĕç.
Чăваш брандмейстерĕсем çине тăнипе пирĕн тăрăхра пушар сиенĕ, ытти регионсемпе танлаштарсан, пысăках пулмарĕ, вăрманти пушарсенче çын та вилмерĕ.
РФ Чрезвычайлă лару-тăру Министерствин хушăвĕпе килĕшÿллĕн вăрман пушарĕсене сÿнтерме хастар хутшăннă Вăрмарти 39 номерлĕ пушар чаçĕн 21 сотрудникне «2010 çулхи пушарсене сÿнтернĕ çĕрте хутшăнакана» медальпе наградăларĕç. Чăннипех те тивĕçлĕ награда.