21 января 2011 г.
Районта иртнĕ Пĕрлехи информаци кунне ЧР Патшалăх Канашĕн председателĕн заместителĕ Г.Васильев, РФ Суд департаменчĕн Чăваш Республикинчи Управленийĕн начальникĕ В.Петров, «Чăваш Республикинчи çĕр кадастр палати» учрежденийĕн пуçлăхĕ Т.Матвеева, Федераллă службăн территори органĕн Чăваш Республикинчи патшалăх службин статистикин пуçлăхĕн заместителĕ Л.Егорова хутшăннă.
Чи малтанах ĕçлĕ ушкăн Вăрмар район администрацийĕн пуçлăхĕпе К.Никитинпа тĕл пулнă, унтан палăртнă ял тăрăхĕсене çитсе унти граждансемпе тĕрлĕ ыйтусем сÿтсе явнă. Пĕрлехи информацин кунĕн тĕп темисем: «Чăваш Республикинчи сывлăх сыхлавĕн системине çĕнетессипе йĕркеленĕ программăна пурнăçа кĕртесси», «Пĕчĕк тата вăтам предпринимательлĕх субъекчĕсен ĕç-хĕлне Федераллă статистика тĕлĕшĕнчен сăнав ирттересси», «2010 çулхи декабрĕн 29-мĕшĕнче тухнă 435 номерлĕ Федераллă Саккуна пурнăçа кĕртесси» пулчĕç.
Г.Васильев ертсе пыракан ĕçлĕ ушкăн чи малтанах районти тĕп больницăн поликлиникинче медицина ĕçченĕсемпе тĕл пулчĕ. Генрих Геннадьевич çитес вăхăтра медицина ĕçĕнче çĕнĕ технологисене ĕçе кĕртме палăртни çинчен тĕплĕн чарăнса тăчĕ. Вăл каланă тăрăх, икĕ çул хушшинче сиплев учрежденийĕсенче телемедицина технологийĕсене ĕçе кĕртмелле. Тĕп тĕллев - вырăнта пахалăхлă медицина пулăшăвĕ парасси. Çавна май Чăваш Республикинчи Сывлăх сыхлавĕн системине çĕнетессипе йĕркеленĕ программăна пурнăçа кĕртме 4 миллиард тенкĕ ытла уйăрнă.
Район администрацийĕн пуçлăхĕ К.Никитин кашни çыннăн хăйĕн сывлăхĕшĕн яваплă пулмаллине каларĕ. Сиплев учрежденийĕсене çĕнетес тĕлĕшпе районта юлашки çулсенче сахал мар ĕç туса ирттернĕ. Кĕтеснер, Чупай ял тăрăхĕсенчи фельдшерпа акушер пункчĕсене çĕнетнĕ, аякри ялсенче, поселокра та çемье врачĕн офисĕсем вырăнти халăха медицина пулăшăвĕ парассипе тăрăшаççĕ. Çитес вăхăтра Кивĕ Мăнтăрти, Саруйĕнчи фельдшерпа акушер пункчĕсене юсама палăртнă. Константин Владимирович «Чăваш Республикинче ял тăрăхĕсенче çурт-йĕре комплекслă майпа компактлă лартас тата вĕсене тирпей-илем кĕртес енĕпе пилот проекта пурнăçласси çинчен» Указа вырăнти ял тăрăхĕсен пуçлăхĕсен вăя кĕртмелли, унпа килĕшÿллĕн социаллă пĕлтерĕшлĕ объектсене çĕнетме май пурри çинчен каларĕ.
Медицина ĕçченĕсен енчен ыйтусем те сахал мар пулчĕç. Вĕсене çамрăк специалистсене пурăнмалли çурт-йĕрпе, йывăр чирсемпе чирлекенсене эмелсемпе çителĕклĕ тивĕçтерес, ĕç укçипе çыхăннă ыйтусем кăсăклантарчĕç.
Ĕçлĕ ушкăн çавăн пекех Тикаш ял тăрăхне çитсе вырăнти халăхпа тĕл пулчĕ. Кунта вĕсем ял тăрăхĕн администрацийĕн, пĕтĕмĕшле пĕлÿ паракан тĕп шкулăн, ача сачĕн, райпо лавккин ĕçĕ-хĕлĕпе паллашрĕç. Г.Васильев ял тăрăхĕн ятне чăвашла тĕрĕс çырса палăртас енĕпе вырăнти ял тăрăхĕн администрацийĕ ЧР Патшалăх Канашне ыйтупа тухни çинчен каларĕ. Çавна май ЧР Патшалăх Канашĕн çитес сессийĕ валли ку ыйтупа ятарласа саккун проектне хатĕрлемеллине палăртрĕ.
Ял тăрăхĕнче çĕрпе тухăçлă ĕçлеççĕ, усăсăр выртакан çĕрсем çук. Вĕсене пурне те пусă çаврăнăшне кĕртнĕ. Кунти пуçаруллă фермерсем кÿршĕллĕ ялсенчи çĕрсене те арендăна илнĕ, тухăçлă усă кураççĕ.
Вĕрентекенсенчен те ыйтусем пулчĕç. Вĕсем Интернетпа çыхăнма май çукраххи, çамрăксем валли çĕнĕ ĕç вырăнĕсем йĕркелемелли çинчен каларĕç.
Ĕçлĕ ушкăн «ОВАС» тулли мар яваплă обществăра та пулчĕ, кунта туса кăларакан продукципе паллашрĕ. Асăннă предприяти пысăк хăватпа ĕçлет. Туса кăларакан изделисене Раççейĕн тĕрлĕ регионĕсенче туянаççĕ, вĕсем ГОСТ требованийĕсене пĕтĕмпех тивĕçтереççĕ. Ĕç укçи те çĕвĕçсен палăрмаллах ÿснĕ. «Пирĕн тĕп тĕллев - çитес вăхăтра трикотаж изделийĕсем кăларакан цех уçасси, çавна май тепĕр 100 вырăнлăх ĕç вырăнĕсем йĕркелесси», - терĕ предприяти директорĕ В.Лукин.
Кивĕ Вăрмар. Ял тăрăхĕнче район пуçлăхĕ, депутатсен районти Пухăвĕн Председателĕ В.Павлов, райадминистрацин ĕçĕсен управляющийĕ Н.Павлов, РФ Суд департаменчĕн республикăри Управленийĕн начальникĕ В.Петров, ЧР патшалăх статистикин ертÿçин çумĕ Л.Егорова пулчĕç. Малтанхи тĕл пулу ял тăрăхĕн администрацийĕнче иртрĕ. Унăн пуçлăхĕ Н.Борисов ял пурнăçĕпе тĕплĕн паллаштарчĕ. 622 кил-хуçалăхĕ кунта, çав шутра 80-шĕ дача участокĕ. 2010 çулта иртнĕ Пĕтĕм Раççейри çыравăн малтанхи кăтартăвĕсем тăрăх 1490 çын пурăнать. Ку - ун умĕнхи цифрăсенчен (1602 пулнă) пĕчĕкрех. Сăлтавĕ вара студентсене, çар хĕсметĕнче тăракансене, тĕрлĕ çĕре нумай вăхăт хушши ĕçлеме çÿрекенсене шута илменнинче. 2010 çул Киввăрмарсемшĕн демографи тĕлĕшĕнчен ырă пулăмпа палăрчĕ - çуралнă ачасен йышĕ (17) вилнисенчен ытларах (15) пулчĕ.
Хĕлле чи çивĕч ыйтусенчен пĕри - çул-йĕре юртан тасатса тăрасси. Çакна ял тăрăхĕн администрацийĕ «Урмарская» кайăк-кĕшĕк фабрикипе килĕшÿ тунă хыççăн ăнăçлă пурнăçланса пырать. Çитес вăхăтрах туса ирттермелли нумай ĕçе палăртнă Николай Иванович. Малтан столовăй пулнă, халĕ пушă ларакан ял варринчи çурта культура çуртне, фельдшерпа акушер пунктне, библиотекăна куçарасшăн. Ял администрацийĕ, бюджета йĕркелекен фабрика кантурĕ, çыхăну уйрăмĕ, шкул, суту-илĕвĕн хăш-пĕр точкисем тахçантанпах тĕпленнĕ вырăна вĕсене куçарса пĕр комплекс туса хурсан çакă пуриншĕн те лайăх пулĕ тесе шутлать.
Унтан информаци ушкăнĕн членĕсем пĕтĕмĕшле пĕлÿ паракан вăтам шкул коллективĕпе тĕл пулса калаçу ирттерчĕç. Тепĕр тĕл пулу «Урмарская» ăратлă кайăк-кĕшĕк фабрики» АУО ĕçченĕсемпе иртрĕ.
- 2010 çулхи çанталăк пирĕн ума йывăрлăхсем кăларса тăратрĕ пулин те коллектив хăйĕн ĕçне тивĕçлипе пурнăçлать. Тырă хакĕ ÿснĕрен, чăх-чĕп аш-какайĕ вара çав шайрах юлнăран хальлĕхе пысăк тупăш илесси пирки калаçу çук. Кĕрхи культурăсем лайăх çитĕнесси çинче пысăк шанăç, - терĕ хуçалăхăн генеральнăй директорĕ Н.Петров.
Пур коллективпа тĕл пулнă чухне те Л.Егорова пĕчĕк тата вăтам предпринимательлĕх субъекчĕсен ĕç-хĕлне Федераллă статистика тĕлĕшĕнчен сăнав ирттересси, 2010 çулхи декабрĕн 29-мĕшĕнче тухнă Федераллă саккуна пурнăçа кĕртесси çинчен ăнлантарса пачĕ. ЧР Сывлăх сыхлавĕн системине çĕнетессипе йĕркеленĕ программăна пурнăçа кĕртесси пирки В.Петров тĕплĕн чарăнса тăчĕ. Çак ыйтусене районта мĕнле татса парасси пирки В.Павловпа Н.Павлов ăнлантарса пачĕç.
Чупай ял тăрăхне çитес умĕн район администрацийĕн пуçлăхĕн заместителĕ Ю.Соколов, «Чăваш Республикинчи çĕр кадастр палати» учрежденийĕн пуçлăхĕ Т.Матвеева «Аван-Полимер», «Светлана» тулли мар яваплă обществăсенче пулчĕç. Чупай ял тăрăхĕнче ĕçлĕ тĕл пулусем ирттерчĕç, çынсен ыйтăвĕсем çине хуравсем пачĕç.
Пĕрлехи информаци кунне Вăрмар район администрацийĕн пуçлăхĕ К.Никитин пĕтĕмлетрĕ.