01 января 2011 г.
Районăн социаллă пурнăçĕпе экономика аталанăвĕнче предприятисен ĕçĕ-хĕлĕ пысăк вырăн йышăнать. Хальхи вăхăтра ăнăçлă ĕçлесе пыракан предприятисем пирĕн районта сахал мар. Хăшĕ-пĕрин иртнĕ çулхи ĕç кăтартăвĕсем те курăмлă. Акă «Вăрмарти йăла ыйтăвĕсене тивĕçтерекен комбинат» муниципаллă унитарлă предприятине илер-ха. Кунта тăрăшса вăй хуракансем çĕнĕлĕхсене пурнăçа кĕртме тăрăшаççĕ. Вĕсем пирки эпир тĕплĕнрех унăн пуçлăхĕнчен Юрий Анатольевич Максимовран ыйтса пĕлтĕмĕр.
- Иртнĕ çулхи кăтартусене пĕтĕмлетнĕ май, кăçал сирĕн предприяти мĕнлерех çĕнĕлĕхсем палăртать?
- Унчченхи çулсемпе танлаштарсан 2010 çула эпир тупăшлă вĕçлерĕмĕр. Юлашки икĕ уйăхра çĕвĕ цехĕ пур вăй-хăватпа тăрăшнине палăртмалла. Çавна май кăçал та пирĕн ĕçченсем халăх ыйтăвне тивĕçтерессипе хастарлăрах пуласса шанас килет.
- Предприяти тупăшлă ĕçлесе пыни çĕнĕ ĕç вырăнĕсем йĕркеленинчен те килет. Эсир кун пирки мĕн шутлатăр?
- Предприяти ăнăçлăхĕ, малашлăхĕ - çирĕп вăй-халлă, ăс-тăнлă ĕçченсем тăрăшнинче. Район администрацийĕн пуçлăхĕ К.Никитин районта çĕнĕ ĕç вырăнĕсем йĕркелес пирки лартнă тĕллевсене ăнăçлă пурнăçласа пыратпăр. Çавна май çамрăк ăрăва ĕç вырăнĕсемпе тивĕçтерес тĕллевпе çĕвĕ производствине анлăлатма палăртатпăр. Çĕвĕ машинисем туянса вĕсемпе тухăçлă ĕçлеме çамрăксене явăçтарас тĕллев лартнă. Районти ĕçпе тивĕçтерекен центрпа килĕшÿ туса çĕвĕ тата атă-пушмак цехĕсене модернизацилессипе бизнес-план йĕркелетпĕр. Унсăр пуçне çитес вăхăтра оргтехника юсакан уйрăм уçăлĕ. Енчен те сирĕн тĕрлĕ тĕслĕ телевизор, холодильник, карас телефон тата ытти йышши оргтехника юрăхсăра тухрĕ пулсан йăла ыйтăвĕсене тивĕçтерекен комбинат яланах пулăшма хатĕр. Çак уйрăм валли инженер-программиста ĕçе илме палăртнă. Шупашкарти педуниверситетпа тачă çыхăну тытатпăр. Малашлăхра унта пĕлÿ пухнă ентеш-специалистсене хамăр патăрта ĕç вырăнĕпе тивĕçтерес тĕллевлĕ. Çитес вăхăтра кунта тăрăшса вăй хуракан специалистсен квалификацине ÿстерессипе те тимлĕпĕр.
Çавăн пекех пирĕн предприяти уйрăм çын предпринимательсене суту-илÿ тумашкăн тÿлевлĕ пулăшу ĕçĕсем парать. Ун хакĕсем вĕсене тивĕçтереççĕ.
- Рынок тапхăрĕнче пурăннă май хаксем те ÿсни куç умĕнче. Çавна май сирĕн предприятинче тÿлевлĕ пулăшу ĕçĕсен хакĕсем пысăк пулмĕç-и?
- Электроэнерги, çут çанталăк газĕ тата ытти япаласен хакĕсем ÿссех пыраççĕ. Эпир вара тÿлевлĕ пулăшу ĕçĕсене 10-15 процентран ытла ÿстерме палăртмастпăр.
Пĕтĕмĕшле каласан ЧР Президенчĕ М.Игнатьев Патшалăх Канашне янă Çырăвне тĕпе хурса вырăнти халăха пахалăхлă тÿлевлĕ пулăшу ĕçĕсем пама тăрăшăпăр.
Йăла ыйтăвĕсене тивĕçтерекен комбинат ĕçченĕсене, кунта чылай çул тăрăшса вăй хунă ветерансене, район халăхне Çĕнĕ çул тата Раштав ячĕпе ăшшăн саламлатăп, ырлăх-сывлăх сунатăп.