24 декабря 2010 г.
«Ялсенчи шкулсен ĕçне тĕплĕ шухăшласа йĕркеленĕ май, вĕсем вĕрентÿ шайĕпе те, пурлăх никĕсĕ тĕлĕшпе те хула шкулĕсенчен кая пулмалла мар», - тенĕ РФ Президенчĕ. Шкул пуласлăхĕ вĕрентекенсен ĕçĕ-хĕлĕнчен те чылай килет. Кавалти пĕтĕмĕшле пĕлÿ паракан тĕп шкулта пурĕ 18 учитель тăрăшса вăй хурать. Вĕсенчен аслă квалификациллĕ категориллĕ - 2 (чăваш чĕлхипе литературине вĕрентекен Н.Авакова, музыка учителĕ В.Табаков), пĕрремĕш квалификациллĕ - 15, иккĕмĕш квалификациллĕ 3 вĕрентекен шутланаççĕ. Кунти вĕренткенсем çулсерен професси ăсталăхне ÿстереççĕ. Çавна май районта, республикăра иртекен тĕрлĕ конкурссене хутшăнаççĕ. Сăмахран, вырăс чĕлхипе литературине вĕрентекен Э.Бормисова республикăри «Çунакан чĕресем», «Çынна воспитани парар», районти «Чĕрене ачасене паратăп» конкурссен призерĕ. Çавăн пекех «Чи лайăх класс ертÿçи» ятне С.Федорова тивĕçнĕ. Кавал шкулĕнче вĕрентекенсем республикăри конкурссене хутшăннипе пĕрлех РФ Президенчĕн грантне те çĕнсе илеççĕ. Ăна чăваш чĕлхипе литературине вĕрентекен Н.Авакова тивĕçнĕ. Çавăн пекех вăл районти «Чи лайăх класс ертÿçи» конкурсăн çĕнтерÿçи, «Çулталăк вĕрентекенĕ - 2010» конкурсăн финалисчĕ. Математика предметне вĕрентекен Ираида Михайловна Николаева та хăйĕн ĕçĕнче пысăк ÿсĕмсем тăвать. Вăл вĕрентекен пулса 32 çул тăрăшса вăй хурать.
Ачасене пахалăхлă пĕлÿ илмешкĕн шкулта библиотека ĕçлет. Валентина Николаевна Алексеева библиотекарь вĕренекенсене кирлĕ кĕнекесемпе тивĕçтерет, тĕрлĕ темăпа кĕнекесен куравне йĕркелет. Библиотека фондĕнче 10 пин ытла кĕнеке упранать.
Юлашки 10 çул хушшинче шкулăн пурлăхпа техника базине çирĕплетессипе чылай ĕçсем туса ирттернĕ. 2003 çулта шкула çут çанталăк газĕ кĕртнĕ, ун çивиттине юсанă. Кашни çулах тĕрлĕ йышши спорт инвентарĕ, пахалăхлă пĕлÿ илмешкĕн тĕрлĕ вĕренÿ пособийĕсем, оборудовани туянаççĕ.
Шкулта компьютер класĕ пур. Пĕр компьютер 10 ачана тивет. Кавал шкулĕнче хальхи вăхăтра пурĕ 82 ача пĕлÿ илет. Кунта Çиçтĕпе, Кивĕ Вĕренер, Пăвакасси, Чăрăшçырма ялĕсенчен ачасене шкул автобусĕпе В.Табаков водитель илсе çÿрет.