10 декабря 2010 г.
Сăпайлă та илĕртÿллĕ, çемçе кăмăллă ĕçчен хĕрарăм вăл. Шăпах шкулта ĕçлемеллискер. Сăмахăм Мăнçырмари вăтам шкулта чăваш чĕлхипе литературине вĕрентекен Татьяна Леонарьевна Цыркунова çинчен пырать.
2002 çултанпа тăрăшать вăл хăйĕн тăван шкулĕнче. И.Н.Ульянов ячĕллĕ Чăваш патшалăх университетĕнчен вĕренсе тухнă çулах ĕçе тытăнать. Ачасемпе ĕçлеме килĕшет ăна, анчах хут ĕçĕ нумай вăхăта тытать. Шкулта, районта, республика шайĕнче иртекен тĕрлĕ конкурссене хутшăнать Татьяна Леонарьевна. 2008 çултанпа вĕрентÿ учрежденийĕнче ĕçлекен çамрăксен канашне ертсе пырать. Кунта шкулта ĕçлекен 35 çула çитмен çамрăксем кĕреççĕ. Шереметьев замокне те экскурсие кайса курнă вĕсем, Шупашкара спектальсене те çÿреççĕ. Кăçал Татьяна Леонарьевна район администрацийĕн укçан паракан хавхалантарăвне тивĕçнĕ.
Ачасене хăйĕн тĕп предметне вĕрентнисĕр пуçне, паянхи кун ыйтакан технологисемпе анлă усă курма тăрăшать. Районти чăваш чĕлхипе литературине вĕрентекенсен ассоциацийĕн руководителĕ те вăл.
Мăшăрĕпе, Эдуардпа, иккĕшĕ ывăл çитĕнтереççĕ, уйрăм çуртра пурăнаççĕ, 5-6 çул хушши пĕрле çÿренĕ хыççăн пĕрлешнĕ вĕсем пĕр çемьене. Мăшăрĕ столяр ĕçĕсем пурнăçламалли цех уçнă, кунта вăл йывăç рамăсем, алăксем ăсталать.
Татьяна Леонарьевна хăй тĕрлĕ семинарсене, мероприятисене хутшăннисĕр пуçне унăн вĕренекенĕсем те олимпиадăсемпе конкурссенче палăраççĕ. Кăçал «Эй, çĕнĕ кунăм, каялла ан кай, ан чак...» интернет-олимпиадăра чи маттуррисем пулнă, пĕлтĕр республика шайĕнче иртнĕ «Халап хапха тăрринче» интернет-конкурсра виççĕмĕш вырăн йышăннă. Кашни çулах Т.Цыркунован вĕренекенĕсем Раççей шайĕнче иртекен «Чĕвĕлти чĕкеç» вăйă-конкурса хутшăнаççĕ, лайăх кăтартусемпе палăраççĕ. Çамрăк вĕрентекенĕн ачасемпе тÿрĕ кăмăлпа ĕçлесси ан иксĕлтĕр.