10 декабря 2010 г.
Кашни професси лайăх, анчах та чун туртни пĕрре. Çак сăмахсем шăпах райадминистрацин вĕрентÿ тата çамрăксен политикин пайĕнче методист ĕçĕнче тăрăшса вăй хуракан Зинаида Николаевна Пуклаковăна пырса тивеççĕ. Мĕн ачаранах хăйĕн пурнăçне педагогика ĕçĕпе çыхăнтарас тĕллевлĕ пулнă вăл.
1960-мĕш çулхи декабрĕн 9-мĕшĕнче çуралнăскер Вăрмарти вăтам шкула вĕренсе пĕтерсен, 1979 çулта И.Я.Яковлев ячĕллĕ Чăваш патшалăх институтне хатĕрленÿ уйрăмне вĕренме кĕрет. 1980 çулта асăннă институтра вĕренме пуçлать. Унтан лайăх паллăсемпе вĕренсе тухса алла диплом илсен Шăхальти вăтам шкулта вĕрентме тытăнать. 1985 çулта Мускав облаçĕнчи Наро-Фоминск хулине куçса каять, 62-мĕш номерлĕ ача садĕнче воспитательте ĕçлеме пуçлать. Çакăнтах Михаил Анатольевичпа çемье чăмăртаççĕ. 1987 çулта вĕсен çемйи Кострома облаçĕнчи Пыщуг ялне куçса каять, Зинаида Николаевна кунти вăтам шкулта кĕçĕн классене вĕрентет. 1995 çулта вĕсем тăван тăрăха таврăнаççĕ. З.Пуклакова Вăрмарти иккĕмĕш номерлĕ вăтам шкулта организатор-педагог ĕçĕнче тăрăшать. 2001 çултан вара райадминистрацин вĕрентÿ тата çамрăксен политикин пайĕнче методист пулса ĕçлет. Вăрмарти Г.Е.Егоров ячĕллĕ пĕрремĕш шкулта йĕркеленнĕ шкулсем хушшинчи методика центрĕн ĕçне йĕркелессипе пысăк ÿсĕмсем тăвать. Вăл тăрăшнипе районти пĕтĕмĕшле пĕлÿ паракан учрежденисем хушшинче перспективлă план йĕркеленĕ. Педагогсен квалификацине ÿстерессипе те кирлĕ условисем йĕркеленĕ. Çавна май юлашки икĕ çул хушшинче 125 вĕрентекен компьютер технологине алла илессипе квалификацине ÿстерекен курссенче вĕреннĕ. Шкулсем хушшинчи методика центрĕн сайтне йĕркелес ĕçре Зинаида Николаевнăн пысăк активлăхне палăртмалла. Асăннă сайт 2008 çулта республикăра иккĕмĕш вырăн йышăннă. З.Пуклакова ресурс центрĕн профильлĕ вĕрентĕвне те йĕркелесе пырать. Вăл Сĕнтĕрвăрринчи вăрман хуçалăх техникумĕпе Мăнçырмари вăтам шкул çыхăнăвне йĕркелесе тăрать. Çак шкулта «Йывăçран ăсталакансем» специальноçпа ятарласа профильлĕ вĕрентÿ йĕркеленĕ. Зинаида Николаевна профильлĕ вĕрентĕвĕн мониторингне ирттерет. 2006 çултан пуçласа ачасен профильлĕ вĕрентĕвĕ 68 процентран 100 процент таран çитнине палăртмалла.
Районти вĕрентÿ учрежденийĕсен ĕç-хĕлне çĕнĕлĕхсем кĕртессипе те чылай вăй хурать Зинаида Николаевна. Çавна май Вăрмарти Г.Е.Егоров ячĕллĕ пĕрремĕш, Кивĕ Вăрмарти вăтам, Чулкасри пĕтĕмĕшле пĕлÿ паракан тĕп шкулсенче «Шкул-2100» программăна пурнăçа кĕртессипе ĕçсем пыраççĕ. Вĕсенче ачасен вĕренÿ пахалăхĕ ÿсни, тĕрлĕ шайри олимпиадăсенче малти вырăнсем тăтăшах йышăнни уççăнах палăрать. Вăрмарти Г.Е.Егоров ячĕллĕ пĕрремĕш вăтам тата Чупайри пĕтĕмĕшле пĕлÿ паракан тĕп шкулсенче физкультура урокĕсене çĕнĕлĕхсем кĕртессипе чылай ĕçсем туса ирттереççĕ. Зинаида Николаевна вĕрентÿ системине çĕнĕлĕхсем кĕртме пулăшса пырать, ку енĕпе кашни шкулпа тачă çыхăнса ĕçлет. Райадминистрацин вĕрентÿ тата çамрăксен политикин пайĕ йĕркеленĕ сайтăн баннерĕнче вăл «РФ тата ЧР Президенчĕн Гранчĕсене тивĕçнĕ вĕрентекенсен опычĕ» ятарлă страница йĕркеленĕ. Çакă вара çулран-çул педагогсен ăсталăхне ÿстерме, профессиллĕ конкурссене тĕплĕн хатĕрленме пулăшать. Виçĕ çул хушшинче районти 34 вĕрентекенрен тăххăрăшĕ чи лайăх вĕрентекенсен конкурсĕнче çĕнтерÿçĕ ятне тивĕçнĕ.
З.Пуклакова вĕрентекенсен ассоциацийĕн ĕç-хĕлне тимлессипе те тăрăшать. Вăл тăрăшнипе 16 ассоциаци йĕркеленĕ. Çавна май фестивальсем, конкурссем, семинарсем, мастер-классем, çавра сĕтелсем ирттерессипе те чылай ĕçлет.
Зинаида Николаевна вĕрентекенсен квалификацине ÿстерессине пысăк тимлĕх уйăрать.
Ĕçне кура - хисепĕ. Ĕçре пысăк ÿсĕмсем тунăшăн З.Пуклаковăна Вăрмар район администрацийĕн, ЧР вĕрентÿ тата çамрăксен политикин министерствин Хисеп грамотисемпе наградăланă.