10 декабря 2010 г.
Пĕтĕм Раççейри халăх çыравне ирттерес тĕлĕшпе йĕркеленĕ Правительство комиссийĕн ларăвĕ иртнĕ. Видеоконференци йĕркипе унта районсен комиссийĕсем те хутшăнчĕç.
Пĕтĕм Раççейри халăх çыравĕн пĕрремĕш тапхăрĕ вĕçленчĕ. Чăвашстат ертÿçи, комисси председателĕн çумĕ Э.Максимова пĕлтернĕ тăрăх республикăра перепись тивĕçлĕ шайра иртнĕ. Перепись участокĕсенче 3829 пин çын вăй хунă, çав шутра 31 проценчĕ - студентсем. Стационар участокĕсенче - 47,7 пин çын.
Октябрĕн 26-29-мĕшĕсенче çурт-йĕрсен 10 процентне тепĕр хут тĕрĕсленĕ, 13,5 пин çынна çĕнĕрен çырнă. 1,3 пинĕшне вара тĕрĕс мар çырни те пулнă. Республикăра 2010 çулти çыравăн малтанхи кăтартăвĕсем тăрăх Чăваш Енре 1251,1 пин çын ялан пурăнни палăрнă, çав шутра Шупашкарта - 463,8 пин. Октябрĕн 14-мĕшĕ тĕлне чикĕ леш енче ялан пурăнакан, Чăваш Республикине вăхăтлăх килнĕ 695 çынна çырнă.
Хальхи вăхăтра перепись хучĕсене компьютерпа тĕрĕслеме хатĕрленеççĕ. Çыравра пухнă информаци анонимлă шутланать, вăрттăнлăха сарма юрамасть.
РФ Правительстви халăх çыравĕн кăтартăвне пĕтĕмлетесси икĕ тапхăрпа иртмелле. Пĕрремĕшĕ - 2011 çулхи çуркунне тĕлне (халăх йышĕн малтанхи кăтартăвне пĕтĕмлетни), иккĕмĕшĕ - 2011 - 2012 çулсенче (кăтартăва туллин пĕтĕмлетни). Çырав кăтартăвĕсемпе интернетра ятарлă сайтра паллашма пулать.
Чăваш Ен Президенчĕн Администрацийĕн ертÿçи А.Иванов яваплă мероприятие тивĕçлĕ шайра йĕркелесе ирттерме пулăшнă организацисене Тав Çырăвĕ пачĕ.