30 ноября 2010 г.
Колумби çĕршывĕнчи Санта Мартара хулинче çичĕ кун хушши пулса иртнĕ тĕнчипе паллă ученăйсен конференцийĕ хыççăн Хуруй ялне нумай çул хушши Вăрмар районĕнче культура пайĕн заведующийĕ пулса ĕçленĕ Павел Иванович Спиридонов патне ывăлĕ Вячеслав килсе кайрĕ. Вячеслав Павлович Мускав облаçĕнчи Дубна хулинчи пĕр институтра теорипе физика лаборатори секторĕн начальникĕ, физикăпа математика наукисен докторĕ. В.Спиридонов тĕнче шайĕнче пулса иртнĕ чи паллă ученăйсемпе пĕрле çак форума хутшăнчĕ. Канада, Испани, Франци, Раççей тата ытти çĕршывсенчен килнĕ доктор-ученăйсен конференцийĕ Санта Мартарăра пĕрремĕш хут пулса иртнĕ.
Раççей докторĕн акăлчанла хăй çырса хатĕрленĕ наука ĕçĕпе çыхăннă пленарлă докладне ученăйсем пысăк хак панă. Эрне хушшинчи конференцире нумай ĕçсене тарăннăн сÿтсе явса, тĕпчесе тухнă докладсен материалĕсенчен хатĕрленĕ кĕнеке те кĕçех кун-çути курĕ. Унта Вăрмар докторĕн ĕçĕ те пулĕ «Кунти конференци чăннипех те ăнăçлă, усăллă, тĕпчевлĕ, вĕрентÿллĕ, тухăçлă иртрĕ», - каласа парать ентешĕмĕр ученăй. Малашне те наука ĕçĕнче татах çĕнĕ, пысăк çитĕнÿсем, çирĕп сывлăх, вăрăм кун-çул сунар ăна, талантлă Вячеслав Павловича, наука докторне, маттур чăваш ачине, Раççей ятне çĕклекене.