30 ноября 2010 г.
Вăрмар райповĕ аталану çулĕпе сулмаклăн утать. Çапла çирĕплетсе калама сăлтавĕ те пур. Кунта çулран-çул суту-илÿпе пулăшу ĕçĕсене анлăлатса, производство хăватне ÿстерсе пыраççĕ. Паллах, хăй тĕллĕн нимĕн те пулмасть: палăртнă тĕллевсене пурнăçа кĕртме сахал мар вăй хумалла. Кунти туслă коллектив йывăрлăхсемпе ăнăçлă кĕрешет, çитĕнÿ хыççăн çитĕнÿ тăвать.
- Ял çыннисен ыйтăвĕсене туллин тивĕçтерме, пурнăçне çăмăллатма тăрăшатпăр, - тет райпо канашĕн председателĕ Сергей Николаевич Харитонов. - Тĕслĕхрен, пĕчĕк ялсенчи тата район центрĕнчен аякра вырнаçнă тăкаклă лавккасене тытса тăни, тавар вăхăтра çитерни те çакнах çирĕплетет. Халăха, уйрăмах ватăсене, меллĕ пултăр, куллен кирлĕ таварсемшĕн аякка каймалла ан пултăр тетпĕр. Пысăк япаласем илсе килме заказсем йышăнатпăр, райпо автомашинисемпе яла çитерсе паратпăр.
Акă Шăхаль ялĕнчи райпо лавккинех илер-ха. Меллĕ вырăнта вырнаçнă вăл. Шкул, ял тăрăхĕн администрацийĕн çурчĕ çак лавккапа çывăх вырнаçнă. Тул енчен хăш-пĕр юсав ĕçĕсем пурнăçламалла кунта. Шала кĕрсен вара вăл хăтлăхĕпе, тавар ассортименчĕ пуяннипе туянакана илĕртет. Асăннă лавккара Елена Николаевна Григорьева 9 çул тăрăшса вăй хурать, вырăнти халăха мĕн кирлипе пĕтĕмпех тивĕçтерет. Уйăхне 200 пин тенке яхăн тĕрлĕ тавар сутать вăл. Тавар ассортименчĕпе те пуян ку лавкка. Хуçалăхра кирлĕ таварсем - çăкăрпа булка изделийĕсем, çурма фабрикатсем, тĕрлĕ йышши кăлпасси, кондитер изделийĕсем тата ытти те. Палăртма кăмăллă: асăннă лавккара сутăнакан таварсенчен ытларахăшĕ райпон «Нива», «Вăрмарти çăкăр завочĕ» тулли мар яваплă обществăсем туса кăларакан продукци. Хура çăкăр та кунта ытти уйрăм çын предприниматель лавккисенчен йÿнĕрех, 13 тенкĕ те 50 пус. Пĕтĕмĕшле каласан, социаллă пĕлтерĕшлĕ апат-çимĕç хакне ÿстермелле маррине çирĕп тытса пырать Е.Григорьева сутуçă.
Лавккана ватти-вĕтти йышлă çÿрет. Вĕсем вара Елена Николаевна сутуçăн ĕçĕпе кăмăллă.