30 ноября 2010 г.
Юлашки вăхăтра Арапуç ял халăхĕ çĕр айĕнчи шыв пăрăхĕсем пĕрмай шăтса тăнипе аптранă. Шыв ыйтăвĕ ял халăхĕшĕн пĕлтерĕшлĕ. Ял çыннисемпе Н.Мельков, В.Васильев ял тăрăхĕн депутачĕсем тăрăшнипе шыв пăрăхĕсене юсама пултартăмăр. Валерий Геннадьевич 3 шăтăкне хăй юсаса сапларĕ, Николай Сильвестрович вара хăйĕн хуçалăхри бульдозерĕпе шыв пăрăхĕсем хунă шăтăксене хуплама пулăшрĕ. Çак ĕçе тума пулăшнă Н.Мелькова, В.Васильева, ял çыннисене тав сăмахĕ калас килет, ыттисене те вĕсенчен тĕслĕх илме сĕнес килет. Çавăн пекех яла тирпей-илем кĕртес ĕç те пĕлтерĕшлĕ. Шкул дирекцине ялти çÿп-çапа пуçтарма сĕнÿ парсан, тÿрех йышăнчĕç ăна. Арапуçĕнчи шкул директорĕ А.Кузьмин тăрăшнипе, Ю.Кузьмина, Э.Антонов вĕрентекенсем ертсе пынипе шкул ачисене çак усăллă ĕçе явăçтартăмăр.