16 ноября 2010 г.
Ноябрĕн 10-мĕшĕнче районти Шалти ĕçсен пайĕн сотрудникĕсем Раççей милицийĕ йĕркеленнĕренпе 93 çул çитнине паллă турĕç. Йĕркелĕх хуралĕнче тăракансене райадминистрацин пуçлăхĕ К.Никитин саламларĕ.
Форма тăхăннă, хăюллă, вăйлă, инкек-синкекрен сыхлама, пулăшма яланах хатĕр çын сăнарĕ пирĕншĕн пуриншĕн те мĕн ачаран паллă. Çитĕнсе пынă май эпир хăйĕн пурнăçне хĕрхенмесĕр преступлени тунине хирĕç тăракан, граждансен канлĕхне, обществăри тăнăçлăха упракан çынсен кулленхи ĕçĕ, куç хупмасăр ирттернĕ каçсем мĕн тери йывăр, нумай енлĕ пулнине ăнланатпăр.
Паян Шалти ĕçсен органĕсен сотрудникĕсене улшăнусен ансат мар тата реформăсем ирттернĕ вăхăтсенче чăтăмлăх, яваплăх, ăс кирлĕ. Тытăм улшăнать, тĕллевсене çĕнетеççĕ, çапах та пирĕн тĕп ĕç кăна улшăнмасть - право йĕркине сыхласси пулнă, пулать те.
Çак уяв кунне районти шалти ĕçсен пайĕн акт залĕнче ĕçре уйрăмах палăрнă С.Авксентьева (милици майорĕ), Т.Корниловăна (юстици майорĕ), В.Илларионова (милици прапорщикĕ), В.Расколова (милицин аслă сержанчĕ), Н.Расколова (милици прапорщикĕ) «Службăра палăрнăшăн» II степеньлĕ медальсемпе чысланă. Çавăн пекех А.Софронов милици майорĕ «Службăра палăрнăшăн» III степеньлĕ медале тивĕçнĕ.
2010 çулхи январь-октябрь уйăхĕсенче шалти ĕçсен пайĕн сотрудникĕсен ĕçĕ нумай енĕпе лайăх кăтартусемпе палăрнă. Çак тапхăрта преступлени тăвасси 16,2 процент чакнă, пурĕ районта 166 преступлени регистрациленĕ (пĕлтĕр çак вăхăт тĕлне - 198). Уйрăмах йывăр преступленисем - 3 (2009 çулта - 5), çаратнă тĕслĕхсем - 5 (2009 çулта - 7) пулнă, вĕсене пурне те уçса палăртнă. Йывăр преступленисене уçса палăртасси (4 процент), хваттерсене çаратассине уçса парасси (12,5 процент) ÿснĕ. 2010 çулхи 10 уйăх хушшинче районти шалти ĕçсен пайĕн сотрудникĕсем граждансенчен 762 заявленисемпе пĕлтерÿсем йышăннă.
Милици сотрудникĕсен ĕçĕ йăлт цифрăсемпе процентсенче, танлаштарусенче палăрать. Анчах та вĕсене хатĕрлеме малтан нумай тăрăшмалла.
Халăх пире шанать, пулăшасса пĕлет. Эпир вара вĕсен шанăçне тÿрре кăларма тăрăшатпăр.