12 ноября 2010 г.
Манăн чи юратнă вĕрентекен - Людмила Витальевна Иванова. Юратса суйласа илнĕ ĕçĕнче вăл 16 çул ытла ĕçлет. Ачасемпе çепĕç кăмăллăскер тăван ен культурипе паллаштарнисĕр пуçне çут çанталăк вăрттăнлăхĕсене ăша хывма пулăшать. Пур енĕпе те пултаруллă вĕрентекен вожатăй тивĕçĕсене те чыслăн пурнăçлать.
Шкул коридорĕнчи стендсене час-часах улăштарать, мероприятисем ирттернĕ чухне шкулти нумай ачана хутшăнтарма тăрăшать. Тĕрлĕ темăпа хатĕрлесе ирттерекен конкурссемпе викторинăсене пĕр ача та хутшăнмасăр юлмасть.
Людмила Витальевна ирттерекен уроксенче ларма яланах кăсăклă. Кашни темăна тĕплĕ ăнлантарать, кĕнеке çинче çук материалсемпе нумай паллаштарать вăл, пирĕн вĕренес туйăма ÿстерет, библиотекăна çÿреме хистет.
Экскурсисем, походсем час-часах йĕркелет, Шупашкара илсе кайса тĕрлĕ музейсемпе паллаштарать, пире илемлĕхе туйма вĕрентет.
Людмила Витальевна маншăн - пурнăç идеалĕ: ырă кăмăллă, çепĕç чĕлхеллĕ, анлă тавра курăмлă, пур енĕпе те пултаруллă вĕрентекен вăл, манăн юратнă учитель.