12 ноября 2010 г.
Велокросра чупса Раççей Кубокне çĕнсе илессишĕн саккăрмĕш тапхăрти, республикăра мала тухассишĕн ирттерекен ăмăртăва тата чемпионата Мускав, Ленинград облаçĕнчи Сосновый Бор, Сестрорецк, Иваново хулисенчи, Удмурт республикинчи «Форвот», Ижевскри «Импульс» тата «Локомотив», хамăр республикăри Шупашкар, Çĕнĕ Шупашкар хулисен, Патăрьел тата пирĕн район командисем хутшăнчĕç.
Старта чи малтанах 1999 çулсенче çуралнă татах та кĕçĕнрех арçын ачасемпе хĕр ачасем тухнă. Пирĕн район командинчи А.Михайлов (Кивĕ Вăрмар) - иккĕмĕш вырăна, çав ушкăнрах М.Чубукова (Çиçтĕпе) иккĕмĕш пулнă.
1995-1996 çулсенче çуралнă арçын ачасем хушшинче Н.Иванов (Пинер) виççĕмĕш вырăн йышăннă. Çак ушкăнра В.Михайлов (Вăрмар поселокĕ), Н.Михайлов (Кивĕ Вăрмар), В.Чубуков (Çиçтĕпе) финиша лайăх результатсемпе вĕçленĕ.
1993 çулсенчи арçын ачасенчен Н.Чубуковпа (Çиçтĕпе) А.Терентьев (Кавал) - лайăххисен шутĕнче.
Вăрмарти стартсем хыççăн пултаруллă велосипедистсем Раççей Кубокне çĕнсе илессишĕн тăххăрмĕш тапхăрти ăмăртăвĕсенче Çĕнĕ Шупашкар хулинче тупăшнă. Ку хутĕнче М.Чубукова (Çиçтĕпе) иккĕмĕш вырăн йышăннă.
Раççей Кубокĕн вуннăмĕш тапхăрти ăмăртăвĕсем Çĕнĕ Шупашкартах иртнĕ. Хăйсен ушкăнĕсенче Н.Иванов (Пинер) - пĕрремĕш, А.Михайлов (Кивĕ Вăрмар) тата М.Семенова (Вăрмар поселокĕ) иккĕмĕш вырăнсене çĕнсе илнĕ.