12 ноября 2010 г.
Вĕренекенсем çеç мар вĕрентекенсем те хăйсен профессиллĕ аталанăвне тĕрлĕ конкурссенче туптаççĕ. Çакă вăл ачасен пĕлÿ шайне ÿстерме пулăшать, вĕрентекене тата та активлăрах пулма хавхалантарать. Кĕтеснерти пĕтĕмĕшле пĕлÿ паракан тĕп шкулти вĕрентекенсем кашни çулах районта иртекен »Çулталăк вĕрентекенĕ» конкурса активлă хутшăнаççĕ. Хутшăнаççĕ çеç мар, лауреат ятне тивĕçеççĕ. Акă акăлчан чĕлхине вĕрентекен А.Викторов учитель асăннă конкурсăн лауреачĕ пулса тăчĕ.
«Чи лайăх класс ертÿçи» конкурсра вара вырăс чĕлхи предметне вĕрентекен Л.Данилова иккĕмĕш вырăн йышăннă. Биологи предметне вĕрентекен Е. Ефимова «Чĕрене ачасене паратăп» конкурсра лауреат ятне тивĕçнĕ. Елена Анатольевнăн вĕрентекен пулас туртăмĕ шкулта вĕреннĕ чухнех çуралнă. Çак тĕллеве ăша хывса вăл ялти вăтам шкултан вĕренсе тухсан 1983 çулта Арзамасри патшалăх педагогика институтне куçăмсăр майпа вĕренме кĕрет. Çав вăхăтрах Кĕтеснерти пĕтĕмĕшле пĕлÿ паракан вăтам шкулта вăй хурать. Асăннă институтран ăнăçлă вĕренсе тухсан тăван ялтах тĕпленсе пурăнать. Ялти вăтам шкулта биологи предметне вĕрентет. Кашни урока хатĕрленсе ачасене пахалăхлă пĕлÿ парассишĕн тăрăшать Елена Анатольевна. Юратса вĕренеççĕ биологи предметне ачасем. Çавăнпа та районти олимпиадăсенче те малти вырăнсене йышăнаççĕ. В.Васильев, А.Павлов, Н.Иванова, Л.Волкова, А.Степанова, К.Викторова тата ытти вĕренекенсем районта тĕрлĕ çулсенче иртнĕ олимпиадăсенче çĕнтерÿçĕсем пулнă.