12 ноября 2010 г.
Чăваш Республикин тăваттăмĕш суйлаври Патшалăх Канашĕн вăтăр иккĕмĕш сессийĕ иккĕмĕш тапхăрпа ĕçленĕ. Хальхинче вăл октябрĕн 26-мĕшĕнче пĕрремĕш вулавпа йышăннă «Чăваш Республикин 2011 çулхи тата планпа пăхнă 2012 тата 2013 çулсенчи тапхăрти республика бюджечĕ çинчен» саккун проектне малалла тишкернĕ. 2011 çулта бюджет 22 млрд та 484,5 млн тенкĕпе танлашĕ. Çав шутра - тавăрса памалла мар хушăм укçа калăпăшĕ 7 млрд та 923,7 млн (7 млрд та 603,5 млн тенки - федераци бюджетĕнчен трансферт шучĕпе килекен сумма) тенкĕ пулмалла. Чăваш Республикин патшалăх парăмĕн калăпăшĕ 11 млрд та 182,1 млн тенкĕ пулĕ. Бюджетри укçа-тенке халăха социаллă пулăшу пама, общество инфратытăмне аталантарма, экономика ÿсĕмне хывма палăртнă. Тăкаксен калăпăшĕ - 23 млрд та 217,5 млн тенкĕ. Чăваш Республикин бюджечĕн 2012 тата 2013 çулсенчи кăтартăвĕсем те пĕчĕк мар. Акă 2012 çулăн параметрĕсем: тупăшсемпе - 23 млрд та 139,3 млн тенкĕ, çав шутра хамăрăн тупăшсемпе - 15 млрд та 048,5млн, профицит - 1 млрд та 090,8 млн тенкĕ. 2013 çулта - тупăшсемпе: 23 млрд та 469 млн тенкĕ, çав шутра хамăрăн тупăшсемпе - 16 млрд та 337 млн, тăкаксемпе - 24 млрд та 593,1 млн, дефицит - 1 млрд та 124,1 млн тенкĕ.