09 ноября 2010 г.
Чăваш Республикин прокуратурин хушăвне пурнăçласа Вăрмар район прокуратури тата ЧР Россельхознадзор Управленийĕн патшалăх ветеринари надзорĕн патшалăх инспекторĕ В.Александров районта выльăх масарĕсене тытса тăрас тĕлĕшпе санитарипе ветеринари требованийĕсене мĕнлерех пурнăçлани пирки тĕрĕслÿ ирттернĕ.
Пирĕн районта выльăх масарĕ пурĕ 32. Вĕсем пирки ветеринарипе санитари карточкисем йĕркеленĕ. Çулталăкра икĕ хутчен (кĕркуннепе çуркунне) районти ветеринари станцийĕн ветспециалисчĕсем выльăх масарĕсене пăхса, тĕрĕслесе тăраççĕ, ятарлă карточкăсене çыраççĕ, актсем йĕркелеççĕ. Юлашки тĕрĕслÿ 2010 çулхи май уйăхĕнче иртрĕ. Çавна май РФ патшалăхĕн ветеринарин тĕп инспекторĕ çирĕплетнĕ ветеринарипе санитари правилисен 5.6 пункчĕпе килĕшÿллĕн ял тăрăхĕсен пуçлăхĕсене ветеринарипе санитари правилисене пăхăнманшăн 6 предписани çырса панă.
ЧР прокуратурин хушăвĕпе 2010 çулхи октябрĕн 18-мĕшĕнче çĕпĕр язвипе чирленĕ пулнă выльăхсен 5 масарне тĕрĕсленĕ. Вĕсем Энтрияль ялĕн тăрăхĕнче вырнаçнă. Шутнерпуç, Шăплат, Уйкас, Энтрияль ялĕсен патĕнчи выльăх-чĕрлĕх масарĕсен картисем хăш-пĕр вырăнта çĕмĕрĕлнĕ, вĕсене çĕнĕрен юсамалла. Çавăн пекех вĕсенче пуринче те ятарлă çырса хунă сигнал таблицисем çук. Çÿлерех асăннă ветеринарипе санитари законодательствине пăснăшăн Энтрияль ял тăрăхĕн пуçлăхĕ И.Яковлев пирки представлени тăратнă.