09 ноября 2010 г.
Вак тата вăтам предпринимательлĕх кунĕ районта «Нефть - Трэвел» тулли мар яваплă обществăна уçнипе пуçланчĕ. ЧР экономика аталанăвĕн, промышленноç тата суту-илÿ министрĕн заместителĕ А.Быченков, район администрацийĕн пуçлăхĕ К.Никитин, райадминистрацин пай начальникĕ Н.Краснова ытти яваплă çынсем асăннă обществăна чаплă лару-тăрура хĕрлĕ хăю касса уçрĕç.
Предприятин малашлăх тĕллевĕсем пысăк. Унăн директорĕ В.Павлов кунта автозаправкăсăр пуçне машинăсем çăвакан цех, кану вырăнĕ, хăтлă лавкка пулмаллине палăртрĕ. Çакна каламалла: çĕнĕ предприятинче хушма ĕç вырăнĕ 10 йĕркеленĕ. Хальхи вăхăтра кунта А.Павлова, Г.Кузьмина, И.Яковлева, А.Бочкарев операторсем, директор заместителĕ С.Петров тăрăшса вăй хураççĕ.
Унтан ĕçлĕ çул çÿрев малалла «Светлана» тулли мар яваплă обществăна пулчĕ. Асăннă обществăн ĕçĕ-хĕлĕпе тĕплĕн паллашрĕç.
Предпринимательлĕх кунĕн пленарлă пайĕ районти Культура çуртĕнче иртрĕ. Ăна район администрацийĕн пуçлăхĕ К.Никитин уçрĕ, вак тата вăтам предпринимательлĕхĕн кăçалхи 9 уйăхри пĕтĕмлетĕвĕсемпе паллаштарчĕ. 2010 çулхи октябрĕн 1-мĕшĕ тĕлне вак тата вăтам предпринимательлĕх ĕçĕнче юридици сăпатĕнче тăракан 107 çын тата 803 уйрăм çын предпринимательсем тăрăшаççĕ. Çакă иртнĕ çулхипе танлаштарсан ытларах. Предпринимательлĕх ĕçĕнче пурĕ 2061 çын тăрăшать, çакă районăн экономика отраслĕнче вăй хуракансемпе илес пулсан 42,4 процентпа танлашать. Хăйсен вăйĕпе туса кăларнă продукцин калăпăшĕ 146,8 миллион тенкĕпе танлашнă. Кăçалхи январь-сентябрь уйăхĕсенче вак тата вăтам предпринимательлĕх субъекчĕсем налук хывасси 4021,4 пин тенкĕпе танлашнă.
«Районта вак тата вăтам предпринимательлĕх вăй илсе пыни районăн социаллă- экономикăллă аталанăвне çирĕплетет, çавна май вырăнта пурăнакансем валли хушма ĕç вырăнĕсем йĕркелеме пулăшать. Çакăн йышши предприятисем уçăлнине пирĕн ырламалла кăна», - терĕ К.Никитин хăйĕн сăмахне пĕтĕмлетсе.
А.Быченков Чăваш Республикинчи вак тата вăтам предпринимательлĕх аталанăвĕ çинче тĕплĕн чарăнса тăчĕ, малашлăх тĕллевĕсене палăртрĕ. Вак тата вăтам бизнеса кредит парса пулăшас енĕпе «Чăваш Республикинчи пĕчĕк бизнеса пулăшу паракан агентство», «ЧР Гаранти фончĕ» ЧР автономи учрежденийĕн, РФ Перекет банкĕн, «Россельхозбанк» акционерсен уçă обществин тата ытти организацисен яваплă çыннисем тухса калаçрĕç.
Район администрацийĕн пуçлăхĕ К.Никитин районăн социаллă-экономикăллă аталанăвне тĕреклетес енĕпе чылай çул тăрăшакан «Уют» тулли мар яваплă обществăн директорне И.Федорова Хисеп грамотипе, Л.Порфирьева, И.Михайлова уйрăм çын предпринимательсене Тав çырăвĕ парса чысларĕ.