19 октября 2010 г.
Республикăри ачасемпе çамрăксен библиотеки тавра пĕлÿ тематипе çыхăннă кĕнекесене ÿсекен ăру хушшинче сарас, чи нумай вулакана тата авторсене тупса палăртас тĕллевпе «Вулавăш премийĕ» конкурс ирттерет.
Виçĕ çулта пĕрре йĕркеленекен пултарулăх тупăшăвне ачасемпе çамрăксем валли çыракан авторсем тата 10-15 çулсенчи хĕр ачасемпе арçын ачасем хутшăнма пултараççĕ. Хăйсен ăсталăхне тĕрĕслеме тĕв тунисен тавра пĕлÿпе çыхăннă чăвашла е вырăсла кĕнекене хакласа рецензи, тишкерÿ çырмалла, çыравçă е хайлаври сăнар патне çыру шăрçаламалла, кĕнекене илемлетмешкĕн сăн ÿкерчĕксем, видеоклип е ÿкерчĕксем янтăламалла. Кĕнеке содержанийĕ тăрăх сценари, постановка е видеофильм хатĕрлеме те ирĕк пур. Чи нумай вулакан автора вара ачасем вĕсен хайлавĕсен тĕлĕшпе мĕн чухлĕ ĕç тăратнинчен палăртĕç.
Материалсене Республикăри ачасем çамрăксен библиотекин наци тата ют çĕршыв литературисен уйрăмне (Шупашкар хули, И.Яковлев проспекчĕ, 8-мĕш А çурт) ярса памалла. Конкурса 2011 çулхи март уйăхĕн 1-20-мĕшĕсенче пĕтĕмлетĕç. Çĕнтерÿçĕсене дипломсемпе, парнесемпе чыслĕç.