19 октября 2010 г.
Çуралнă вырăнăн тĕтĕмĕ те пылак тенĕ пек, маншăн та хам çуралнă ялăн, манăн пĕчĕк тăван çĕршывăн - Çитмĕшĕн çырми-çатри те, чуллă сăрчĕ те, çыннисем те - пуринчен лайăххисем, чуна çывăххисем. Тăван ялăмра тĕрлĕ профессие алла илнĕ çынсем пурăнаççĕ:учитель, агроном, бухгалтер, водитель, тракторист тата ыттисем те.
Халĕ вара сăмахăм тракторист профессине суйласа илнĕ Власовсен çемйи пирки пулĕ. 1935 çулта кун çути курнă Леонид Илларионович Власов. Унăн ашшĕ хăй вăхăтĕнче колхоз председателĕ те пулнă теççĕ, кĕскен каласан, вăл ялта ятлă çын шутланнă. Ывăлне, Леонид пиччене, çирĕп дисциплинăллă çемьере ÿсме тивнĕ. Вăл та ялта ятлă çынсен ретĕнче пулнă: хисеплĕ тракторист. Шел пулин те, çамрăклах сарăмсăр вилĕмпе пурнăçран уйрăлнă. Унăн ывăлĕн, Юрий Леонидовичăн, вара амăшĕпе кăна çитĕнме тивнĕ. Мĕн тăвăн, пурнăç шăпи çапла килсе тухнă пулĕ. Çурма тăлăх ача пурнăç çине урăхларах куçпа пăхса, хăй çине ытларах шанма хăнăхса ÿснĕ. Çакă вара ăна малашнехи кун-çулта питех те кирлĕ пулнă. 1962 çулта çуралнăскер, малтан ялти пуçламăш шкулта вĕреннĕ, унтан Кĕлкешри вăтам шкула çÿренĕ. Ăна ăнăçлă вĕренсе пĕтерсен район центрĕнчи ДОСААФ автошкулне çÿреме тытăннă. Водитель правине илсенех унăн салтака кайма ят тухать. Çапла Юрий 1981 çулта Украинăра службăра тăма тытăнать. Салтакра пулнишĕн вăл пĕрре те ÿкĕнмест, савăнать кăна. «Арçын пулса çуралнă кашни çыннăн салтакра пулмалла, Тăван çĕршыва сыхламаллах - ку пирĕн тивĕç», - тет Ю.Власов. Сăмах май каласан, унăн ывăлĕ Леонид хальхи вăхăтра салтак тивĕçне пурнăçлать. Вăл поезд çинчи машинист помощникĕ пулма Юдинăра вĕренсе тухнă. Ывăлĕ те ашшĕ пекех техникăна килĕштерет пулас. Мĕн ачаран ашшĕ ĕçлекен трактор çумĕнче ÿснĕскер, пĕр ĕçе те тиркесе тăмасть. Кĕçĕн ывăлĕ, Эдуард, Кĕлкешри вăтам шкула вĕренсе пĕтерсен тÿрех Шупашкарти электромеханика техникумне кайса кĕрет. Халĕ вăл унта иккĕмĕш курса çитнĕ.
Юрий Леонидовичăн мăшăрĕ - Ольга Софроновна. Юрий, пулас мăшăра таçта аякра шыраса çÿремен, кÿршĕ хĕрнех, куç умĕнче выляса ÿснĕскернех тупнă. Тату пурăнаççĕ Власовсем. Малтанхи вăхăтра пĕр вĕçĕм «Россия» совхозри виççĕмĕш уйрăмра трактористра вăй хурса ырă ята тивĕçнĕ вăл. Кашни çулах ăна лайăх ĕçшĕн тĕрлĕрен Хисеп грамотисемпе хаклă парнесем парса хавхалантарнă. Хуçалăх саланнă хыççăн та ĕç шыраса таçта аташса çÿремен вăл, юнашар ялти фермер патĕнче вăй хума тытăнать. Г.Ямуков фермер вара унăн ĕçĕпе çав тери кăмăллă. «Пĕр ĕçрен те пăрăнса çÿресе курман, мĕн хушнине пурне те тĕплĕн пурнăçлать ĕçпе пиçĕхсе ÿснĕ тракторист», - тет вăл Юрий Леонидович пирки сăмах тапратсан. Çакăн пек çынсем хамăр ялта пурăннишĕн чăннипех те савăнмалла, кун пеккисем ытларах кăна пултăрччĕç.