19 октября 2010 г.
Хаçат-журнал тĕнчи питĕ интереслĕ те илĕртÿллĕ. Нумай çĕнни вуласа пĕлме пулать. Хаçат-журнал рынокĕнче те хăйне евĕрлĕ конкуренци пырать. Кашни издани вулакансене хăй патне илĕртсе тăрать. Йăлт укçа-тенкĕпе çыхăннă. Чăваш хаçат-журналĕсем хушшинче уйрăм конкуренци. Пирĕн районта ытларах чăвашла тухса тăракан изданине кăмăлласа çырăнса илеççĕ иккен («Хĕрлĕ ялав», «Кил-çурт, хушма хуçалăх», «Хресчен сасси»). Октябрĕн 1-мĕшĕ тĕлне район хаçатне 2011 çулхи пĕрремĕш çур çуллăха 500 экземпляра яхăн çырăнса илнĕ. Хальлĕхе çырăнтарăвăн планне 15 процентне тултарнă темелле. Вырăсла изданисенчен ытларах «Аргументы и факты», «ЗОЖ», «100 советов», «Наша кухня», «Приусадебное хозяйство» вулакансен кăмăлне тыткăнлаççĕ. Вăрмарти почта çыхăнăвĕн уйрăмĕнче çырăнтару пайĕнче ĕçлекен В.Лаврентьева шăп та лăп халăха хаçат-журнал çырăнтарса парассипе ĕçлет. Районти тĕрлĕ организацисенчен хаçат-журнал çырăнмалли заказсем йышăнать, издательствăсемпе çыхăнать. Акă, тĕслĕхрен, Кивĕ Вăрмар, Мăнçырма ялĕсенче халăх «Хĕрлĕ ялав» хаçата йышлăн çырăнса илет.
Çапах та йÿнĕрех хакпа хаçат-журналлă пулас тесен октябрĕн 14-24-мĕшĕсенче ятарлă вунăкунлăх иртет.