19 октября 2010 г.
Иртнĕ çул РФ Правительствин хушăвĕпе килĕшÿллĕн федераллă бюджетран Раççей субъекчĕсене хамăр çĕршывра туса кăларакан автотранспорт хатĕрĕсем тата коммуналлă техника туянма субсиди уйăрса пачĕ. Çавна май пирĕн районти «Пурăнмалли çурт-йĕрпе коммуналлă хуçалăх» муниципаллă унитарлă предприяти икĕ çĕнĕ автомашина туянма пултарчĕ.
Малтан вакуумлă КО-50313 машина хăваласа килчĕç. Вăл шĕвĕ каяшсене механизациленĕ майпа пуçтарса илме, палăртнă вырăна илсе кайса тăкма май парать. Унтан коммуналлă хуçалăх хытă çÿп-çапа турттаракан КО-440-2 машинăпа пуянланчĕ. Ку техника механизациленĕ майпа хытă çÿп-çапа контейнерсенчен кузов çине тиет, пусăрăнтарать тата кайса тăкать.
- Кун пек техникăпа тухăçлă ĕçлесен поселокра малашне контейнерсем тĕрлĕ ăпăр-тапăрпа тулса лармасса шанас килет, - тенĕччĕ пĕр калаçура Вăрмар хула тăрăхĕн пуçлăхĕ Валерий Александрович Иванов.
Коммуналлă хуçалăх пуçлăхĕсем те çав тĕллевпех вăй хураççĕ, поселокра тивĕçлĕ йĕрке тăвассишĕн сахал мар тăрăшаççĕ. Çавна май çак çĕнĕ автомашинăсемпех ĕçлекен водительсен ĕç кунĕ ир-ирех пуçланать.
Поселокра пурăнакансем асăрханă пулĕ ĕнтĕ, контейнерсем çинчи çÿп-çапа турттаракан автомашина водителĕ хăйĕн ĕçне ирхине 6 сехетрех пуçăнать. Çапла вара Кивĕ Шулхан ялĕнче пурăнакан Андрей Васильевăн ыйхăран ир-ирех вăранса Вăрмар поселокне ĕçе васкама лекет.
- Автомашина çĕнĕ чухне ĕçлеме те кăмăллă. Поселокра çÿп-çап пуçтармалли контейнерсем нумай. Çавăнпа ирех ĕçе кÿлĕнме лекет. Поселокри кăна мар, хăш-пĕр ялсенчи ăпăр-тапăра та вăхăтра илсе тухмалла-çке. Пур çĕре те ĕлкĕрмелле, - тет кăмăллăн Андрей Васильевич.
Унăн ĕçĕпе коммуналлă хуçалăх пуçлăхĕ Юрий Григорьевич Иванов та кăмăллă.