19 октября 2010 г.
Кавалта пурăнакан Екатерина Никифоровна Кузнецова кĕçех 88 çул тултарать. Ял-йыш хисеплет ăна, сума сăвать. Çакна вăл пархатарлă ĕçпе çĕнсе илнĕ. Тăван хуçалăхра 30 çул ытла хурт-хăмăр ăстинче тÿрĕ кăмăлпа вăй хунă. Хăйĕн вăхăтĕнче хуçалăх 100 пуç ытла вĕлле тытнă. Çакă хуçалăха самаях пысăк тупăш панă. Ахальтен-и «Ленинский» совхоз дирекцийĕ пархатарлă ĕçшĕн Екатерина Никифоровнăна темиçе хутчен хаклă парнесем парса чыс тунă. Унăн ĕçĕпе килтисем те кăмăллă пулнă. Коля ывăлĕ шкулта 6-мĕш класра вĕреннĕ чухнех амăшне пулăшма çÿренĕ. Хурт-хăмăр ăсти ĕçне хăнăхса пынă. Пĕлĕве малалла ÿстерес тĕллевпе Мускав облаçĕнчи Балашихăри Пĕтĕм Союзри ял хуçалăх институтне куçăмсăр майпа вĕренме кĕрет. Ăнăçлă вĕренсе пĕтерсен зоотехник специальноçне илет. Салтакран таврăнсан, хурт-хăмăр ĕрчетессине хăй çине илет. «Кирек мĕнле ĕçре те, енчен те çав ĕçе чун-чĕререн юратса пурнăçласан, ÿсĕм тума пулатех. Эпĕ хам ĕçленĕ çулсенче кашни çемье пуçне 50-шар килограмм ытла та пыл илсе курнă. Паллах, продукци ытларах илес пулсан, чи малтанах условисем кирлĕ. Çавăн пекех мĕн пур мероприятисене, зоотехника наукин вĕрентĕвĕсене яланах вăхăтра, пахалăхлă пурнăçлани пысăк пĕлтерĕшлĕ. Тепĕр чухне çакна та илтме пулать: «Пĕр пек çанталăк условийĕсенчех мĕнле майпа çакăн пек ÿсĕмсем тума пултаратăр? - тесе ыйтаççĕ. - Кунта пĕр сăмахпа кăна хуравлама çук. Хĕллехи вăхăтра хурт-хăмăра мĕнле пăхса усранинчен, чир-чĕрсене хирĕç епле кĕрешнинчен тата ытти нумай факторсенчен килет продукци туса илессине ÿстересси», - тет Николай Михайлович Кузнецов кăмăлтан.
2004 çулта Н.Кузнецов хресчен (фермер) хуçалăхĕ йĕркелет. Ăна ĕçре мăшăрĕ, Нина Петровна тата Надьăпа Катя хĕрĕсем, кĕрÿшĕ, вĕсен ачисем пулăшаççĕ.
Унăн хальхи тĕллевĕ - мĕн пур хурт-хăмăр çемйине хĕлле тĕрĕс-тĕкел каçарма тĕплĕн хатĕрленесси.