15 октября 2010 г.
Савăнмалли пулăм пулсан та «çумалла» тесе эрех черкки ярса илетпĕр, хуйха та тулли черккепех пусаратпăр. Кăмăл енчен йăвашрах, çемçерех характерлă çынсене «çапса хуçма» та ансатрах. Кăмăл пăсăлсан ăна хăпартма эрех пулăшать. Пĕрре пулăшать, иккĕ, виççĕ... Юлашкинчен унсăр пурăнма та май çук иккен. Арçынăн стаканпа, хĕрарăмăн черккепе тетпĕр. Хĕрарăм эрех ĕçни тата та тискертерех пек туйăнать.
Упăшки Мускава ĕçлеме çÿреме пуçланăранпа пĕчченех тăра-тăра юлчĕ Нинук килĕнче. Тунсăх пусарма пĕччен пурăнакан кÿршĕ хĕрарăмĕ каçа-каçа ларчĕ хăнана. Çук çĕртен сăлтав тупса килте тунă сăмакунне йăтса килетчĕ. Иккĕшĕ те пĕр чĕлхе тупса сĕтел хушшине ларчĕç, черкке хыççăн черкке пушатрĕç. Нумайччен тăсăлчĕç çакăн пек тĕл пулусем. Акă пĕринче ăнсăртран Нинук мăшăрĕ Мускавран таврăннă. Çул çинчен ывăнса килнĕ арçынна килте эрех ĕçсе ÿсĕрĕлнĕ арăмĕ кĕтсе илнĕ. Урса кайнă арçын хăй мĕн тунине те ăнланса çитеймен, алла çĕçĕ илнĕ те арăмне чиксе вĕлернĕ. Хăй аллипе хăйĕн çывăх çыннине пĕтерсе хунă.
Милици сотрудникĕсем умĕнче çак киревсĕр ĕçе хăех тунине йышăннă, анчах çапла туса хунăшăн питĕ ÿкĕннĕ. Пурнăç тĕллевĕ те пĕтнĕ унăн. Çапла хăйне хăй пĕтерсе хунă. Чăтма çук йывăр вăхăтра хăйĕн çине аллине хунă.