15 октября 2010 г.
Ку шкула пурĕ таврари 17 ялтан 247 вĕренекен çÿрет, педколлектив 26 çынран тăрать. Аслă категориллĕ вĕрентекенсем 4, пĕрремĕш категориллисем 11, иккĕмĕш категорине тивĕçлисем - 4. 2004 çултанпа шкул директорĕнче Галина Ивановна Архипова ĕçлет. Шкулта «ЧР Тава тивĕçлĕ вĕрентекенĕ» ята икĕ учитель илме тивĕç пулнă – Т.Табакова тата Р.Гурьева, вĕсем иккĕшĕ те аслă категориллĕ вĕрентекенсем, республика, район шайĕнче иртекен тĕрлĕ конкурссен çĕнтерÿçисем. Акă Татьяна Рудольфовна Табакова «Чи лайăх вĕрентекен» конкурса хутшăнса ЧР Президенчĕн Грантне çĕнтерсе илме пултарнă. «Класс руководителĕн чи лайăх сайчĕ» конкурсра Р.Гурьева призер пулса тăнă. Çавăн пекех шкулта икĕ кадет класĕ пур. Кадетсем уроксене ятарлă формăпа çÿреççĕ. 10 а класс кадечĕсем иртнĕ вĕренÿ çулĕнче Муркаш районĕнче иртнĕ çамрăк армеецсен «Орленок» вăййисенче 3-мĕш вырăна тухнă. Унсăр пуçне кадетсем тĕрлĕ конкурссене хутшăнса Раççей шайĕнче иртнĕ ăмăртусенче пĕр, республика шайĕнче 10, районта 25 призлă вырăнсем йышăннă. Кадетсен вĕрентĕвĕнче тĕп предмет – пурнăç хăрушсăрлăхĕн никĕсĕсем.
Олимпиадăсене хутшăнассипе те палăраççĕ шкул ачисем. 2009-2010 вĕренÿ çулĕнче район шайĕнче 30 призлă вырăн, республикăра 5, Раççей шайĕнче 3 призлă вырăнсем йышăннă. Наукăпа практика конференцийĕсенче те пултарулăх кăтартаççĕ вĕсем. Районти конкурссене хутшăнса 46, республикăра – 19 призлă вырăн йышăннă. Шкул историйĕ спорт çитĕнĕвĕсемпе те пуян.
Çулсерен тĕрлĕ ăмăртусене хутшăнса чылай хутчен çĕнтерÿçĕ ятне илнĕ шкул команди. «Рукодельница», «Кулинария», «Веселые шашки» тата ытти тĕрлĕ кружоксем ĕçлеççĕ.