15 октября 2010 г.
Иртнĕ кунсенче Вăрмарти Шалти ĕçсен пайĕн 2010 çулхи 9 уйăх кăтартăвĕсене пăхса тухрĕç, пĕлтĕрхи çак вăхăтрипе танлаштарчĕç, ку е вăл енĕпе преступлени тăвасси мĕнле сăлтавсене пула ÿснине тишкерчĕç, пĕтĕмлетÿсем турĕç. Канашлăва ЧР Шалти ĕçсен министерствин Уголовнăй шырав Управленийĕн начальникĕн заместителĕ Ш.Касанов, Вăрмарти Шалти ĕçсен пайĕн начальникĕ И.Константинов, райадминистрацин вĕрентÿпе çамрăксен политикин пайĕн начальникĕ Ю.Соколов, район прокурорĕ Е.Краснов тата районти Шалти ĕçсен пайĕн ытти сотрудникĕсем хутшăнчĕç.
Милици сотрудникĕсен ĕçĕ питĕ кăткăс та йывăр. Чи малтанхи тивĕçĕ преступлени шутне чакарасси, айăпа кĕнĕ çынсене тивĕçлĕ наказани парасси, граждансене мирлĕ пурнăç парнелесси. Мĕнле ĕçсем туса ирттернĕ-ха вĕсем кăçалхи 9 уйăх хушшинче çак тĕллевпе; Районти Шалти ĕçсен пайĕн штатĕнче паянхи куна 77 çын. Пурин те вĕсен хăйсен уйрăм тивĕçĕсем. Пĕлтĕр çак вăхăт хушшинче 170 преступлени регистрациленĕ пулсан, кăçал –158. Вĕсене кăçал уçса палăртасси 75 процентпа, иртнĕ çул 86,5 процентпа танлашнă. Уйрăмах йывăррисем 2010 çулта 4, 2009 çулта 2 пулнă. Çапах та ÿсĕрле тунă преступленисен йышĕ икĕ хут ÿснĕ, çул çитмен ачасем йĕркене пăсни 4-ран 6 çитнĕ. Районти шалти ĕçсен пайĕн ĕçченĕсем граждансенчен пурĕ 1160 заявленине йышăннă. Шырава тăратнă 5 преступникрен 3-не тупнă.
Шарипжан Касанов преступленисене уçса палăртнă чухне ытларах оперативлă шырав майĕсемпе эффективлă усă курмаллине, унсăрăн ĕç малалла каймассине палăртрĕ. «Преступленисен шучĕ чакни ытти йĕрке пăснă тĕслĕхсене тупса палăртас ĕç эффективлăхне ÿстерекенни пулмалла. Пĕчĕк лав туртакан лаша йывăр лав туртаканнинчен, паллах, хытăрах чупайрать», - терĕ вăл.
Милицин участокри уполномоченнăйăсен ĕçĕ-хĕлĕпе Ю.Муткин паллаштарчĕ. Поселокра кăçал пурĕ 4 видеокурав камери вырнаçтарнă, ку участковăйсен ĕçĕнче самай пулăшать. «Участковăйсен пурин те Анискин пек пулмалла, чи малтан харпăр-хăйĕнчен ыйтмалла, унтан тин ыттисенчен», – ытарлăн каларĕ Ш.Касанов.
Октябрĕн 1-мĕшĕнчен кĕрхи призыв пуçланчĕ. Çара каяссинчен тарса çÿрекеннисемпе мĕнлерех ĕçленипе кăсăкланчĕ Ю.Соколов. Хальлĕхе Республика Çар ĕç комиссариачĕн Вăрмар тата Куславкка районĕсен пайĕ салтака каяссинчен хăраса çÿрекеннисем пирки пĕлтерни пулман-ха. Шалти ĕçсен пайĕнче çамрăксем суд умĕнче явап тытнипе тытманнине тĕрĕслеççĕ. Эрех ĕçсе ÿсĕрĕлнĕ вăхăтра тунă преступленисен шучĕ ÿснĕ пулин те килти условисенче сăмакун хатĕрлемелли аппаратсене тупса палăртнă тĕслĕх пулман. Çак енĕпе ытларах ĕçлемеллине палăртрĕ район прокурорĕ Е.Краснов. Çапах та кăçалхи 9 уйăх хушшинче усал шĕвекпе наркăмăшланса больницăна лекменни курăмлă.
Çул-йĕр çинче кăçал 25 авари пулнă, вĕсенче 6 çын пурнăçĕ татăлнă (пĕлтĕр çак вăхăт тĕлне – 7). Инкексен сăлтавĕ чи малтанах - çул çинче хăвăртлăха ÿстернинче, унтан эрех ĕçсе руль умне ларнинче. Кăçал хăвăртлăха ÿстернĕ 602 пулăм, иртнĕ çул – 494 регистрациленĕ. Иртнĕ çул эрех ĕçсе руль умне ларнă 70 тĕслĕх, кăçал – 58. Пирĕн районти шкулсенче 11 автобус тата 2 ГАЗель. Вĕсен хăйсен ятарласа çÿремелли маршрут пур. Çав маршрутран пăрăнма юрамасть, анчах йĕркене пăснă тĕслĕхсем тĕл пулаççĕ. Акă кăçал шкул автобусĕсен водителĕсем 3 хутчен çул-йĕр правилине пăснă. ГАИ сотрудникĕсен уйрăмах ачасене туртаттаракан транспорта тĕрĕслесех тăмалла.
«ЧР Шалти ĕçсен министерстви хăйĕн кăтартăвĕсемпе Атăлçи федераци округĕнче 2-мĕш вырăн йышăнать. Çак вырăна пирĕн тивĕçлĕ шайра тытса тăмалла, çавăнпа республикăри кашни районти шалти ĕçсен пайĕн ăнăçлă ĕçлесе пымалла, кăтартусемпе палăрмалла, çитменлĕхсене пĕтермелле», - тенĕ Шарипжан Касанов.