08 октября 2010 г.
Вĕрентекен, вĕрентекен!
Сана чунтан эп тав тăватăп,
Сан умăнта пуçа таятăп
Ăс панăшăн пире куллен.
Петĕр Çăлкуç.
Кашни çыннăн кун çулĕнче хăйĕн учителĕ пур. Вăл ăна пĕлÿ тĕнчипе паллаштарнипе пĕрлех пурнăçа та вĕрентет, вĕренекенсемшĕн вăхăтне те, вăй-халне, чун-чĕре ăшшине те шеллемест. Шăпах çакăн пек учительсемпе тĕл пулчĕç те Вăрмарти Г.Е.Егоров ячĕллĕ пĕрремĕш вăтам шкулта аслă класра вĕренекенсем Вăрмарти ача-пăча библиотекинче Ваттисен кунĕ умĕн. Ыр кăмăллăх каçĕ «Профессии прекрасней нет на свете» хатĕрлекенĕсем тата ертсе пыракансем - библиотека ĕçченĕсем Г.Петрушковăпа Е.Михайлова пулчĕç. Хăнана килнисен шутĕнче - Ю.Лаврентьева, Г.Терехина, Е.Баданова, Е.Сергеева тата М.Голубева вĕрентекенсем. Хальхи вăхăтра вĕсем пурте тивĕçлĕ канура. Ачасене тарăн пĕлÿ парассишĕн ырми-канми нумай-нумай çул тăрăшнă вĕсем Вăрмарти пĕтĕмĕшле пĕлÿ паракан вăтам шкулта. Çав хушăрах ача-пăча библиотекине, вĕренекенсене кĕнекепе туслаштарма сахал мар çул уçнă. Акă, Юлия Михайловна паянхи кун та хăйĕн пĕтĕм вăй-халне 4 «Б» класра вĕренекенсемшĕн парать, библиотекăпа та тачă çыхăну тытать. Нумай çул хушши ĕнтĕ Елена Ильинична тата Мария Сергеевна тивĕçлĕ канура. Çапла пулин те «кану» сăмахĕ вĕсем валли мар тесен те ытлашши пулмĕ. Çак уявра та Елена Ильинична ертсе пынипе «Парне-сарне» ача-пăча фольклор ушкăнĕ хутшăнса илем кÿчĕ. Канăçсăр чунлă вĕрентекенсем çак уявра тайма пуç сăмахсемпе пĕрле, юрă кĕввисемпе, ташăсемпе, ачасем хатĕрленĕ сценкăсемпе киленме пултарчĕç. Вĕсене вăрăм кун-çул, çирĕп сывлăх тата иксĕлми телей сунса библиотекарьсемпе ачасем чечек çыххисем парнелерĕç.