28 сентября 2010 г.
Ятне улăштарнипе тĕсне улăштарас çук. Малтан мĕнле пулнă çаплипех юлать. Çыннисем те çавсемех. Улшăну тесен, штатсене кĕскетсен кăна ĕнтĕ. Çапла тăвас пулсан, тиевĕ те самай курăмлă пулĕччĕ. Правительство йышăнăвĕпе 2012-мĕш çулта лейтенантăн шалу укçи 33000 тенкĕрен кая мар пулмалла.
Аслăраххисем, должноçра лараканнисем, темиçе хут та ÿсме пултарĕç. Пурнăç пĕр вырăнта тапăртатса тăмасть. Унăн кустăрми шав малалла чуптарать. Хаксем те çĕпре пекех йÿçсе хăпарĕç. Килес çул пенсионерсен, бюджетниксен, ытти социаллă сферăсенче ĕçлекенсен шалăвне ÿстерме палăртнă. Вара пирĕн пурнăç татах та палăрмаллах улшăнĕ. Кун пирки пĕрре те иккĕленÿ çук.
Полицисен тата кăкăр çинче çакса çÿремелли паллă (жетон) та пулать-мĕн. Ку паллă кам, хăш уйрăмран пулнине пĕлтерет. Атту эпир халĕ суя милиционерсен серепине те лекме пултаратпăр хăш чухне. Çак полици структуринче ĕçлекенсем тÿрремĕн прокуратурăна пăхăнса тăма тивĕç. Вĕсем прокуратурăн хăш-пĕр яваплăхне хăйсем çине илĕç. Тĕрлĕрен йăх-яхран, террористсенчен, наркотиксемпе, эрех-сăрапа айкашакансене самаях пăркăчлама пултараççĕ вĕсем, штраф суммине те ÿстерĕç, паллах. Эпир кивĕ саманан йĕркисене пăрахăçласа Европа, тĕнче шайĕнчи паха енсене йышăнса алла илетпĕр, компьютер, инноваци, нанотехнологи ĕмĕрĕн такăр çулĕпе утма тăрăшатпăр. Пирĕн ытти индустриаллă, лайăх, вăйлă аталаннă çĕршывсенчен юлма юрамасть. Ялан çĕннине шырамалла, пурнăçа кĕртмелле. Çакна тума пирĕн РФ Президенчĕ Д.Медведев ялан асăрхаттарать. Пирĕн çирĕп чунлă, пуян наци пулмалла. Вутра çунса хĕрнĕ хурçă туслăха çирĕп тытса пымалла. Малашлăхри çутă ĕмĕтсене пурнăçа кĕртмелле. Вара эпир хамăра чăннипех те телейлĕ теме пултаратпăр.