28 сентября 2010 г.
Республикăри «Сывлăх» наци проектне пурнăçа кĕртни сывлăха сыхлас ĕç кăтартăвĕсене палăрмаллах лайăхлатма май пачĕç. Çавна май пирĕн районта та юлашки çулсенче сывлăха сыхлас ĕçе пысăк тимлĕх уйăраççĕ. Районти тĕп больницăна, поликлиникăна çĕнĕ йышши медицина оборудованийĕсемпе тивĕçтереççĕ.
Кăçалхи май уйăхĕнчен пуçласа районти тĕп больницăн поликлиникинче ача-пăча консультацийĕн иккĕмĕш хутĕнче ача-пăчасен стоматологи кабинечĕ уçăлнă. Çĕнĕ кабинета коридора хĕссе пысăклатма тивнĕ. Ятарласа ачасен шăлĕсене юсамалли Бразилире туса кăларнă «ГНАТУС» çĕнĕ йышши оборудовани, ытти хатĕрсем, сĕтел-пукан туяннă, ăшă шывпа - тепĕр майлă каласан кабинета мĕн кирлипе йăлт тивĕçтернĕ. 2002 çултанпа стоматологи уйрăмĕнче терапевт пулса ĕçленĕ Галина Григорьевна Петрова халĕ ачасен шăлĕсене юсать. Çакăн валли вăл вĕренсе ятарлă сертификат илнĕ. Елена Ивановна Кузнецова медсестра ачасен шăлĕсене тĕрĕслет, ачасене рекомендацисем парать. Ку кабинетра тин çуралнă ачасенчен пуçласа 15 çула çитнисене йышăнаççĕ. Г.Петровăпа Е.Кузнецова шăлсене епле упрамаллине, тасатмаллине ăнлантарса шкул ачисемпе занятисем ирттереççĕ.
Кунне 20-шер ача çăвар хăвăлне тĕрĕслесе, юсаса тухать çак кабинетран. Г.Петровăпа Е.Кузнецова стоматологи ĕçченĕсем хальхи вăхăтра ача садне çÿрекен ачасен шăлĕсене тĕрĕслетчĕç .