24 сентября 2010 г.
Пирĕн тăрăхран паллă медицина ĕçченĕсем сахал мар тухнă. Вĕсенчен пĕри - Вăрмар поселокĕнче çуралса ÿснĕ Мария Степановна Алексеева гинеколог-акушер.
Район центрĕнче вăтам шкултан вĕренсе тухсан вăл тÿрех Чăваш патшалăх университечĕн медицина факультетне çул тытнă, 1973 çулта ăнăçлă вĕренсе пĕтернĕ. Унтанпа 38-мĕш çул ĕнтĕ хăй суйласа илнĕ профессипе тăрăшать.
1976 çулта Вăрмар каччипе, пулас иккĕмĕш рангри капитанпа, Виталий Васильевич Алексеевпа çемье çавăрнă хыççăн нумай çул хушши тинĕс-çар флочĕн тĕрлĕ гарнизонĕнчи поликлиникăсенче вăй хурать. Шыв айĕнче ишекен атомлă кимĕ командирĕн çемйи малтан Çурçĕр, каярах Лăпкă океан флочĕсенче пулать. Мария Степановнапа Виталий Васильевич пĕр-пĕрне çуршар çул тата ытларах курманни те чылай пулнă. Ара атомлă кимĕ командирĕн шыв айĕнче çĕр чăмăрĕ тавра çаврăнма та тивнĕ, ытти чылай çар заданийĕсене пурнăçланă. Анчах туйăмсем сивĕнмен, пачах урăхла - çирĕпленсех пынă. Икĕ ывăл пăхса çитĕнтернĕ вĕсем. 1988 çулта Камчаткăран Мускава куçса килнĕрен пурте вĕсем тĕп хулара тĕпленнĕ. Андрей Витальевич строитель профессине суйласа илнĕ. Алексей Витальевича вара театр илĕртнĕ, çавăнпа та Щукин театр училищине вĕренме кĕнĕ. Халĕ вăл Тверской урамри çамрăксен театрĕнче рольсем калăплать, унсăр пуçне кинора та ÿкерĕнет. Куракансем ăна «Таежный роман» сериалта, «Солдаты», «Не может быть» кинофильмсенче курма пултарнă.
Мария Степановна вара халь Мускаври 6-мĕш номерлĕ больницăра уйрăм заведующийĕнче вăй хурать. Медицина наукисен кандидачĕ, чылай тĕпчев ĕçĕсен авторĕ. Çапла вара Тĕп хулара тĕпленнĕ Вăрмарсен çемйи хăйсен пархатарлă ĕçĕпе Тăван çĕршывшăн чылай ырă ĕç тунă, тăвать те.