21 сентября 2010 г.
Вăрмар районĕнчи пĕрремĕш вăтам шкулта физикăпа математика енĕпе 10 Б класра вĕренекен Галия Загриева 2010-2011 вĕренÿ çулĕнче Чăваш Республикин Президенчĕ ячĕпе паракан стипендие илме тивĕçлĕ пулса тăнă. Республикăри чи маттур 25 шкул ачисен шутне кĕнĕ вăл.
Естесствăлла наукăсем патнелле туртăнакан Галиян юратнă предмечĕ математика, информатика. Шкулта, районта иртекен мероприятисене активлă хутшăнать вăл. Акă иртнĕ вĕренÿ çулĕнче пурнăç хăрушсăрлăхĕн никĕсĕсем предмечĕпе районти олимпиадăра вăл 1-мĕш, республика шайĕнче 3-мĕш вырăн йышăннă. «Анне чĕри» темăпа «Чи лайăх интернет-произведени» конкурса хутшăнса республикипе пĕрремĕш пулнă Галия. Шкулта информатикăпа иртнĕ олимпиадăра пĕрремĕш пулнă. Çавăн пекех вăл «Орленок» çарпа спорт вăййисене хутшăнакан шкул командин командирĕ. Май уйăхĕнче иртнĕ черетлĕ вăйăсенче те унăн команди районта пĕрремĕш пулнă. Галия районти воллейбол командин активлă членĕ. Обществăлла пурнăçа хутшăнмасăр тăма пултараймасть вăл. Ташлама та ăста, шкулта иртекен концертсене ертсе пырать. Унăн аппăшĕ Камиля вара 11-мĕш класра «пиллĕк» паллăсемпе кăна вĕренет. Йăмăкĕнчен ытларах вăл кĕнекесемпе ларма юратать, вĕренÿ уншăн чи малта. Çак пултаруллă хĕрсен тĕслĕх илмелли пур. Вĕсен амăшĕ Вăрмарти пĕрремĕш вăтам шкулта информатика вĕрентекенĕ Светлана Николаевна Матросова 2010 çулта Раççей Федерацийĕн Президенчĕн 200 пин тенкĕлĕх Грантне çĕнсе илнĕ. Апла пулсан 2010 çул çак çемьешĕн тухăçлă иртет.