10 сентября 2010 г.
Иртнĕ уйăхра районти физкультурниксемпе спортсменсем, спорта юратакансем, сывă пурнăç йĕркине тытса пыракансем Физкультурник кунне анлăн паллă турĕç. Çавна май районта та, ун тулашĕнче те тĕрлĕрен спорт ăмăртăвĕсем йĕркелерĕç, Вăрмарсем вĕсене активлă хутшăнчĕç, лайăх результатсемпе савăнтарчĕç.
Раççей профсоюзĕсен Тĕп совечĕ çитĕнсе çитнисем хушшинче бокс енĕпе кĕрешсе мала тухассишĕн Шупашкарта ирттернĕ чемпионатра Вăрмар поселокĕнчи «Алмаз тĕпренчĕкĕсем» спорт клубăн воспитанникĕ И.Николаев (малтанхи тренерĕ унăн ашшĕ Г.Николаев) виççĕмĕш вырăна тухнă.
Вăрмарти «Илем» физкультурăпа спорт комплексĕнче шывра ишес енĕпе ял тăрăхĕсенчен килнĕ тĕрлĕ ÿсĕмри спортсменсем хутшăннă. Ăмăртăва килнисене район пуçлăхĕ К.Никитин ăшшăн саламланă, çĕнтерÿçĕсене парнесем парса хавхалантарнă.
Республикăри футбол чемпионатне хутшăнса пирĕн района Куславккари «Витязь» команда килнĕ.
Йĕпреçри «Спартак» стадионта республикăри урам командисем спартакиади иртнĕ. 18 командăран, пĕтĕмĕшле кăтартусемпе, пирĕн район команди саккăрмĕш вырăна тухнă, чи лайăх вунă команда шутне кĕнĕ.
Мини-футбол енĕпе 8 команда тупăшнă. Шашистсен ăмăртăвĕ те интереслĕ иртнĕ.
Августăн 20-мĕшĕнче Шупашкарта дуатлон енĕпе (велосипедпа тата çуран чупасси) Раççей кубокне çĕнсе илессишĕн ăмăртнă. Вăлах республика чемпионачĕ те шутланнă.
Раççей Кубокĕшĕн пынă çивĕч кĕрешÿре Вăрмар поселокĕнчи Д.Иванов (Çĕнĕ Шупашкарти Олимп резервĕсен училищинче вĕренет) Раççей спорт мастерĕ (тренерĕсем Л.Агапова, В.Дмитриев) саккăрмĕш вырăн йышăннă, спорт мастерĕн кандидачĕн нормативне пурнăçланă. Пултаруллă спортсмен малтан 5 километра çуран, унтан 20 километра велосипедпа, юлашкинчен 2,5 километра çуран чупнă. Ку ăмăртăва çĕршыври чи чаплă спортсменсем: тĕнче класлă мастерсем - П.Андреевпа Е.Кириллов (Красноярск крайĕ), спорт мастерĕсем И.Мажухин, Д.Савельев (Саратов облаçĕ), М.Кузьмин, Д.Лекомцев (Удмурт Республики) тата ыттисем килнĕ.
- Питех те шел, спорт мастерĕн нормативне те пурнăçлаймарăм. Лайăх велосипед пулнă пулсан, пĕр иккĕленÿ те пулма пултараймастчĕ, хамăн тĕллеве пурнăçлаттăмах. Сăлтавĕ - пĕтĕмпех чаплă велосипед пулманнинче, - хăйĕн кăмăлсăрлăхне пытармасть Дима.
Дуатлон енĕпе республика чемпионатĕнче вара вăл пĕрремĕш вырăн йышăнать, чемпион ятне çĕнсе илет.
Августăн 21-22-мĕшĕсенче Çĕнĕ Шупашкарта 66 килограмм таран таякан ветерансем хушшинче дзюдо енĕпе Раççей чемпионачĕ пулнă. Пирĕн ентеш И.Михайлов (тренерĕсем Н.Сейфуллин, Л.Уливанов, О.Васильев Вăрмар поселокĕ) адвокат виççĕмĕш вырăн йышăннă.
Августăн 21-мĕшĕнче Шупашкарти «Олимпийский» стадионта ирттернĕ Пĕтĕм Раççейри урамсенчи баскетболистсен «Хĕрлĕрех сарă мечĕк» массăллă ăмăртăвĕсене пирĕн районтан тĕрлĕрен ушкăнсенче виçĕ команда тупăшнă. 1993 çулсенче çуралнă арçын ачасемпе хĕр ачасен команди уйрăмах ăнăçлă ăмăртнă.
Ăмăртăва хутшăннă кашни спортсменах футболка парса чысланă.
Велосипедистсем хăйсен пултарулăхĕпе чăннипех те савăнтараççĕ. Çĕмĕрле районĕнчи Пĕренĕш ялĕнче велосипедистсен нумай кунлăха пынă ăмăртăвĕсем иртнĕ. ЧР тава тивĕçлĕ тренерăн В.Сидоровăн воспитанникĕсем унта лайăх результатсем кăтартрĕç. Августăн 21-мĕшĕнче Олимп вăййисен чемпионне В.Ярды велосипедиста асăнса шоссе çинче чупассипе республика кубокĕн финалти ăмăртăвĕсем пулнă. 1998-1999 çулхи хĕрачасем хушшинче М.Чубукова (Çиçтĕпе) пĕрремĕш вырăн йышăннă. Арçын ачасенчен çак ушкăнра А.Чубуков иккĕмĕш пулнă.
1996-1997 çулсенчи хĕр ачасенчен В.Васильева (Вăрмар поселокĕ) чи мала тухнă Д.Яковлев та (Кивĕ Вĕренер) чемпион ятне тивĕçнĕ. В.Чубуковăн (Çиçтĕпе) виççĕмĕш вырăнпа килĕшмелле пулнă.
1994-1995 çулхи арçын ачасенчен А.Терентьев (Кавал) иккĕмĕш вырăна тухнă.
1992-1993 çулсенче çуралнă юниорсем хушшинче А.Мельков (Çиçтĕпе) иккĕмĕш вырăн йышăннă.
Тĕнчипех палăрнă пултаруллă велосипедистка, Раççей спорт мастерĕ В.Андреева (Çĕнĕ Шулхан, малтанхи тренерĕ В.Семенов) пире хăйĕн çитĕнĕвĕсемпе тăтăшах савăнтарать. Санкт-Петербургри тупăшура та вăл хăйĕн ушкăнĕнче чемпионат ятне тивĕçнĕ. Маунтинбайк енĕпе Канадăра, иртнĕ тĕнче чемпионат ĕнче вуннăмĕш вырăн йышăнчĕ.