10 сентября 2010 г.
2010 çулхи сентябрĕн 1-мĕшĕ тĕлне районти халăха ĕçпе тивĕçтерекен центр патшалăх учрежденине 1178 ĕçсĕр çын пынă. Пĕтĕмĕшле илес пулсан çак вăхăт тĕлне ĕçпе тивĕçтерекен центр пулăшнипе 1094 çынна яланлăх тата вăхăтлăх ĕç вырăнĕ тупса панă.
Юрист, экономист, чăваш чĕлхипе литературине тата вырăс чĕлхипе литературине вĕрентекен, секретарь-референт, медицина сестри, бухгалтер, ветеринари врачĕ профессиллĕ специалистсем ĕç рынокĕнче кирлех марри сисĕнет.
Çав вăхăтрах квалификациллĕ рабочисем – электриксем, газоэлектросварщиксем, котельнăй операторĕсем, çĕвĕçсем, каменщиксем çителĕксĕрри витĕмлĕ курăнать. Çавăнпа та ĕç паракансене квалификациллĕ работниксем кирлине кура пирĕн центр ĕçсĕр граждансене 138 тĕрлĕ профессие (специальноçа) вĕренме ярать. 2010 çулхи сентябрĕн 1-мĕшĕ тĕлне 88 ĕçсĕр çынна алла çĕнĕ професси илме янă. Тĕслĕхрен, вĕсем газоэлектросварщик, котельнăй операторĕсем, уйрăм хуралçă, парикмахер пулса тăраççĕ.
Обществăлла ĕçсене 147 çын хутшăннă. Вĕсенчен ытларахăшĕ – хĕрарăмсем. Çавăн пекех вĕренÿрен пушă вăхăтра вăхăтлăх ĕç вырăнĕпе çул çитмен 358 çамрăка явăçтарнă, 289818,52 тенкĕ тăкакланă. Ачасем пушă вăхăтра ватăсене, пулăшу ыйтакансене юр тăкма, территори тасатма, ял хуçалăх ĕçĕсене пурнăçлама пулăшнă. Пирĕн центр урлă çамрăксем «Урмарская» ăратлă кайăк-кĕшĕк фабрикинче, «Нива», «Обществăлла апатлану» тулли мар яваплă обществăсенче, ял тăрăхĕсен администрацийĕсен ĕçĕсенче те тăрăшнă. Вăтамран çул çитмен пĕр çамрăк пуçне материаллă пулăшу виçи 1068 тенкĕ тухнă.
Республикăра ĕçсĕрлĕх ÿсессине сыхлас тата граждансене ĕçрен кăларса ярас хăрушлăх пулсан Чăваш Республикинчи ĕç рынокĕнчи социаллă экономикăллă лару-тăрăва çирĕплетме 2010 çул валли ятарлă тĕллевлĕ программа хатĕрленĕ пулнă. Вăрмар районĕнче ĕçсĕр тăрса юлма пултаракан 175 çынна вăхăтлăх ĕçе вырнаçма 2868,8 пин тенкĕ, 2009-2010 вĕренÿ çулĕнче вĕрентÿ заведенийĕсенчен вĕренсе тухнă 20 çамрăка стажировка вăхăтĕнче ĕçе вырнаçма 286,9 пин тенкĕ уйăрма, ĕç вырăнне кирлĕ оборудованипе тивĕçтерсе 2 инвалида 60 пин тенкĕлĕх ĕçе вырнаçтарма планланă. 2010 çулхи сентябрĕн 1-мĕшĕ тĕлне хăйсен ĕçне пуçарса яма 89 çын бизнес-план хатĕрленĕ, вĕсене валли 5 292 пин тенкĕ куçарнă.