10 сентября 2010 г.
Кăçалхи çул ЧР Физкультурăпа спорт, туризм, культура, вĕрентÿ министерствисем, «Советская Чувашия» хаçат А.Николаев космонавт-летчике халалласа ирттерекен эстафета чупăвне - Прессăн спорт фестивальне - йĕркелерĕç. Эстафетăн пĕрремĕш тапхăрĕ сентябрĕн 5-мĕшĕнче Вăрмар поселокĕн тĕп стадионĕнче «Хĕрлĕ ялав» хаçат парнисене çĕнсе илессишĕн иртрĕ.
«Хĕрлĕ ялав» хаçат парнисене çĕнсе илессишĕн ирттернĕ эстафета чупăвĕ массăлăхпа палăрса тăчĕ. 400 ытла спортсмен хăйсен пултарулăхне ăмăртура тĕрĕслерĕ. Кашни вăтам тата тĕп шкултан, предприятисемпе организацисенчен, учрежденисенчен командăсем йышлăн килнĕ. Çанталăкĕ маларах ăмăр тăнăскер, ятарласа тенĕ пекех спортсменсемшĕн пулчĕ тейĕн. Хĕвел хăйĕн ăшă пайăркисене çĕр çийĕн пĕр хĕрхенмесĕр сапаларĕ, ăмăртăва хутшăннисен кăмăл-туйăмне çĕклерĕ.
Спорт уявне район администрацийĕн пуçлăхĕн çумĕ Ю.Соколов уçрĕ, ăмăртура çитĕнÿсем тума, малашлăхра район чысне республикăра та мала çĕклеме сунчĕ. Çавăн пекех эстафета чупăвне хутшăнакансене Вăрмар хула администрацийĕн пуçлăхĕ В.Иванов, районти спорт шкулĕн директорĕ С.Архипов, «Хĕрлĕ ялав» хаçатăн тĕп редакторĕ П.Алексеев саламларĕç.
Ăмăрту ялавне çĕклеме спортăн тĕрлĕ енĕпе палăрнă Д.Ивановпа С.Антонов (Вăрмар поселокĕ) çамрăксем тивĕçрĕç. Унтан Н.Изосимов тĕп судья ăмăрту йĕркипе паллаштарчĕ.
Старта чи малтанах «Спорт çемйисем» ушкăн тухрĕ. Пĕрремĕш вырăна Энĕшпуç ял тăрăхĕн пуçлăхĕн Ивановăн çемйи тухрĕ. Иккĕмĕшпе виççĕмĕш вырăнсенче Чулкасри Павловсен тата Кĕлкешри Даниловсен çемйисем пулчĕç.
Пĕтĕмĕшле пĕлÿ паракан шкулсен ушкăнĕнче Пинер шкулĕнче ăс пухакан çамрăкĕсене çитекен пулмарĕ. Чупай шкулĕнче вĕренекенсем, ăмăртăва икĕ командăпа килнĕскерсем, иккĕмĕшпе виççĕмĕш вырăнсене никама та памарĕç.
Вăтам шкулсен ушкăнĕнче Канашри 6-мĕш вăтам шкул команди малти вырăна тухрĕ. Иккĕмĕш вырăна - Энĕшпуç шкулĕ, виççĕмĕшне Кĕлкешсем тухрĕç. Ял тăрăхĕсен пĕрлештернĕ ушкăнĕнче Чупайсем пĕрремĕшсем пулчĕç. Иккĕмĕшпе виççĕмĕш вырăнсене Энĕшпуçсемпе Арапуçсем йышăнчĕç.
Районти предприятисемпе организацисем хушшинче 39 " Пушар хуралĕн команди пĕрремĕш вырăна тухрĕ, Вăрмар район администрацийĕн спортсменĕсем - иккĕмĕш, район больницин команди - виççĕмĕш пулчĕç. Спорт уявне йеркелекенсем мала тухнă спортсменсемпе командăсене грамотасемпĕ наградăларĕç, район хаçатнĕ çитес çулăн пĕрремĕш çур çулнĕ çырăнтарса пачĕç. Ушкăнсенче пĕрремĕш вырăна тухнă командăсен сентябрĕн 11 мĕшĕнче Шупашкарта иртекен Прессăн спорт фестивалĕн иккĕмĕш тапхăрĕнче хутшăнса Вăрмар район чысне çÿллĕ шайра хÿтелессе шанас килет.
Юлашкинчен çак ăмăртăва йĕркелеме пулăшнăшăн район администрацийĕн пуçлăхĕн çумне Ю.Соколова, райадминистрацин физкультурăпа спорт секторĕн заведующине Л.Агапована, районти спорт шкулĕн директорне С.Архипова, спорт мероприятийĕн судйисене Н.Изосимова, А.Ноздрина тав сăмахĕ калас килет. Чупай, Энĕшпуç, Çĕнĕ Кинчер, Кавал, Аслă Чак, Кĕлкеш, Чулкас, Пинер, Пысăк Енккасси, Урнар, Тикаш, Шăхаль, Арапуç, Кĕтеснер шкулĕсен командисене уйрăмах лайăх хатĕрленнине палăртмалла. Апла пулсан çамрăк ăру сывă пурнăç йĕркине тытса пырас шанчăк пур- ха.